الفنان عمر كمال لـ هاني مهنا: تصريحاتك عنصرية وطبقية.. واحنا مش متطفلين وهنادي بنتك دعتنا للفرح.. وعندي تسجيل صوتى لهنادى وأخلاقى تمنعنى أنشره.. ولو عايز تحسن صورتك كنت اتصلت بيها وإحنا نشرف أي حد

رد الفنان عمر كمال، على تصريحات الموسيقار هانى مهنا، حول حضورهم حفل زفاف ابنته هنادي، قائلاً: "إحنا ناس مش متطفلين ولا نعرف مكان الفرح ولا هنعرف ترتيباته، أكيد هنتجه لأى فرح في الدنيا يا إما بدعوة أو بشغل، طبعًا كلمتنى الفنانة هنادى مهنا ربنا يسعدها يا أحمد خالد صالح، ونتمنى لهم حياة سعيد.

وكشف عمر كمال لتليفزيون "اليوم السابع" تفاصيل مكالمة هنادي مهنا لدعوته لحضور حفل زفافها قائلاً: "هنادي كلمتنى وقالتلى عمر أنا حباكم جدًا وانتوا اخواتنا ياريت تنورونى في فرحي، وأنا ماليش علاقة بشاكوش وبيكا وياريت تديني أرقامهم أو تدخلهم في مكالمة جماعية، ولما حاولت مردوش وبعتلها أرقامهم، وقالتلى إنهم مردوش، وأنا قولتلها خلاص أنا هكلمهم وهاجي الفرح".

أكد كمال أنه تلقى مكالمة هاتفية من الفنانة هنادي مهنا لدعوتهم لحضور حفل زفافها، وتابع قائلاً: "أنا مش ماشيين في مصر الجديدة ليقنا فرح في فندق روحنا دخلنا، ده مش منطقى، ولو إحنا عايزين نروح أي مكان فيه فنانين كنا روحنا مهرجان الجونة، عيب يتقال علينا كدا ومش محتاجين لده إحنا روحنا الساعة 2 بالليل عشان مش فاضيين أصلا وعندنا شغل.

وتابع عمر كمال، لم نتقاض أجرا للغناء في حفل الزفاف، ولم ألتق بالموسيقار هاني مهنا، ولم نهتم نشوف حد، إحنا دخلنا على الترابيزة وقدمنا فقرتنا وغادرنا.

وأضاف كمال، لو الموسيقار هانى مهنا شافنا على المسرح وإحنا بنرقص وطالما عارف إننا مش متوجها لنا دعوة ليه مطلبش من أمن الفندق يطردونا.

وأضاف عمر كمال: مكالمة الموسيقار هاني مهنا أمس زعلتنى جدًا لما قال إنه عازم الفنان تامر حسني وحكيم ودول حاجة تشرف، يعنى إحنا مش حاجة تشرف إحنا الحمد لله بندخل أكبر فنادق في مصر وبنروح كل الدول العربية، وكل الشوارع في مصر عارفانا، إحنا ذوق وبيقول رايحيين عشان شهرة، ولو مروحناش يقولوا اتنكوا على أيه دول لسه سنة أولى نجومية دا إحنا روحنا قدرنا الناس.

وحول استقبال هنادي مهنا وأحمد خالد صالح لعمر كمال وشاكوش وبيكا في حفل الزفاف قال عمر كمال "الاستقبال كان فوق الراس، وطلبوا التقاط صور معانا، دى حاجة تشرفنا، والعروسة والعريس وكل الناس كانوا فرحانين" طيب ليه تنكدوا علينا وتنكدوا عليهم، وتحطوا العروسة في موقف محرج.

أكد الفنان عمر كمال، أنه لم يتلقَ مكالمة عتاب من حسن شاكوش وبيكا حول أزمة تصريحات الموسيقار هاني مهنا، بسبب حضورهم حفل زفاف ابنته هنادي والفنان أحمد خالد صالح، وتابع قائلا: "محدش كلمنى منهم عشان يعاتبني وهما متأكدين لأنى أرسلت لهم مكالمة صوتية من هنادي مهنا، ويعاتبوني لو أنا ضرتهم زى ما بيقول الموسيقار هانى مهنا أنى كنت عايز أجامل هنادي روحت جيبتهم معايا، هما مش ولاد أختى عشان أخدهم في أيدي وأروح بيهم الفرح.

وأكد كمال، أنه لا يفكر في نشر مكالمة هنادي مهنا أو الرسالة الصوتية، وتابع قائلاً: مش عايز الأمور توصل لهذه المرحلة وعيب جدًا ودي عروسة ربنا يفرحها ليه يوصل لكده، وهيا بتشكرنا وذوق جدًا وإحنا بنشكرها أنها تعتبرنا زي اخواتها ومبسوطة بينا وبتسمعنا.

أقسم بالله أنا مش عايز أرد عشان الناس بتقول بيتلككوا عشان التريند، بس إحنا شكلنا وحش لو مطلعناش ردينا، "بيتقال علينا متطفلين" لا إحنا روحنا بناء على دعوة من بنت حضرتك اللى عزمتنا وفى كمان تأكيد على الحضور، وحضرتك كنت في الفرح لو كنت قولت دول مش مرغوب فيهم كنت روحت لمنظمى الفرح وقولتلهم إيه اللى جابهم.

وأكد عمر كمال أنه لم يتواصل مع الفنانة هنادي مهنا بعد تصريحات والدها، لأنها عروسة، مشيرًا إلى أنه أيضا لم تتواصل معه أو تقوم بالاتصال به قائلا: "أعتقد أنها محرجة هتتصل تقول إيه"

وحول ما قيل أن تصريحات الموسيقار هاني مهنا كانت محاول لتحسين صورته بعد بيان نقابة المهن الموسيقية، قال عمر كمال: "دى حاجة ترجعله، لكن حتى لو هو عايز يحسن شكلة وعايز يطلع من الموقف ده كان ممكن يقول بنتي اللى عزمتهم وميحرجهم ناس راحتله بالمنظر ده، وكمان شوفت تصريحات بيقول فيها اني كداب، طيب ليه كد يعني يبقي كويس لو أنا طلعت المكالمات ده ماينفعش إحنا في غنا إننا نيجي.

وحول سبب عدم اتصال بالفنانة هنادي مهنا للخروج وتوضيح الأمور، قال عمر كمال: "دى عروسة في شهر العسل، أنا مش عايز ادخل في السكة دى خالص.

وأشار عمر كمال أن بيان نقابة المهن الموسيقية جاء بسبب حضور حمو بيكا لحفل الزفاف لوجود مشكلة بين النقابة وبيكا، لكن التصريح الصادر من الموسيقار هاني مهنا بيقول أنا معزمتهتش ومعرفهمش التصريح فيه شوية عنصرية أو طبيقة مش ظريفه.

وأكد عمر كمال أنه لو قام أي شخص بدعوته لحضور حفل زفاف سيقوم بالحضور وتابع قائلا " احنا ولاد ناس مش بلطجية وواثقين في نفسنا ونشرف أي حد، وبنحضر أفراح ناس كتير جدا ومهمين.

ووجه عمر كمال رسالة للموسيقار هاني مهنا قائلا:" أستاذ هاني إحنا بنحبك جدًا، وأنا من صغرى أتربيت على عزفك وحضرتك جبر الخواطر أهم من أي حاجة في الدنيا، وكان ممكن قبل ما تطلع تقول التصريح ده كنت ترفع سماعة التليفون وتكلم بنت حضرتك وتقولها إيه اللى حصل وهتقولك، وبعدين تطلع تقول هما حضورا بدعوة من بنتى وهيا لها حرية، ولو حضرتك إحنا مش عاجبينك تروح تلوم على بنتك انها بتسمعنا، وإحنا نشرف أي حد زى ما الفنان تامر حسنى وحكيم وأى فنان حد حضر الفرح كلهم اخواتنا وبنتعلم منها، وأحنا بنشرف أي حد واحنا حضر أو محضرناش كانوا مشغلين الأغاني بتاعتنا.