نص أقوال أمين الشرطة المجنى عليه خلال تحقيقات قضية "طفل المرور": "طلبت الرخص من المتهم قالى مش معايا والعربية ديه هيئة قضائية".. سبني وسخر مني وصورني دون موافقتي.. وكشفنا على الرخص فتبين انتهاؤها منذ 2015

** مستقلو المركبات أخبرونى بوجود عربية مرسيدس يستقلها طفل ويقودها بسرعة جنونية

** لاقيت العربية داخلة عليا وشاهدت عيل صغير يقود السيارة وبصحبته 4 عيال

** أصدقاؤه قالولى: احنا ممكن نضربك ونقعدك جمب أمك

**اتحركت لمقدمة العربية لأخذ أرقام اللوحة لاقيته اتحرك فجأة وهوشنى خلانى اقع على الأرض

** بعد نص ساعة لاقيت الطفل وأصدقاؤه جايين ناحيتى وبيصورنى ويهددونى وقالولى مش هنوقفك هنا تانى

** وبعدها بنص ساعة جالي الطفل ومعاه أصحابه واعتذرلى

تواصل "اليوم السابع" نشر نص تحقيقات جهات التحقيق مع المجنى عليه محمد فوزى أمين شرطة بالإدارة العامة للمرور، فى القضية المعروفة إعلاميًا بـ"طفل المرور"، والتي وجهت فيها اتهامات للطفل بالاعتداء والتنمر على فرد شرطة، وظهوره في مقطع فيديو على مواقع التواصل الاجتماعي، خلال سبه الآخرين بألفاظ نابية هو و4 آخرين من أصدقائه.

وجاءت نص التحقيقات كالتالى:

أقوال المجنى عليه:

س/ الاسم والسن؟

ج/ محمد فوزى جاد الله  35 سنة

س/ ما طبيعة عملك واختصاصك الوظيفى؟

ج/  أنا أعمل أمين شرطة ثالث بالإدارة العامة لمرور القاهرة بقسم مرور البساتين واختص بتظيم الحركة المرورية بدائرة القسم وتحرير المخالفات المرورية لقائدى المركبات باختلاف أنواعها.

س/ منذ متى وأنت تباشر مهام عملك واختصاصك؟

ج/ منذ حوالى 10 سنوات.

س/ ماهي تفصيلات ما حدث ومعلوماتك بشأن الواقعة محل التحقيقات؟

ج/ اللى حصل إن أنا كنت معين خدمة مرورية في ميدان بيتشو بزهراء المعادى وكان ذلك بتاريخ 26 أكتوبر 2020 والخدمة بتاعتي من الساعة 6 صباحا وحتى الساعة 4 عصرا وفى نفس اليوم حوالى الساعة 12 ظهرا لقيت بعض المواطنين مستقلى المركبات بيخبروني بأن فيه عربية مرسيدس لونها أسود سايقها عيل صغير وبيسوقها بطريقة متهورة وبيعمل غرز في الشارع، وأنا واقف في الخدمة لقيت العربية جاية عليا فوقفتها ولقيت فعلا عيل صغير سايقها ومعاه 4 عيال من سنه راكبين العربية فسألت الطفل قائد العربية وقولتله فين الرخص قالى مش معايا رخص والعربية دي هيئة قضائية بتاعت بابا ، وانا لاحظ ان زجاج العربية ملون "فاميه" فأصريت على أنه يطلعلى رخص العربية وهو كان بيقولى مش معاه وبيتكلم بأسلوب مش كويس لاقيته بيقولى انت مش عارف بتكلم مين وانت مش عارف انا ابن مين وبعدين لقيت أصحابه اللى راكبين العربية قعدوا يوجهوا ليا كلام ويقولولى " احنا ممكن نضربك ونكسحك ونقعدك جمب امك لولا انك راجل كبير" فوجهت سؤالى للطفل اللى سايق العربية وقولتله انا عايز الرخص فقالى مش معايا ولاقيته بيسالنى فين كمامتك فقولتله مش معايا فقالى ابعد وشك بعيد عنى وابعد ايدك عن العربية.

وبعدها انا اتحركت كام خطوة لمقدمة العربية وهوشنى فخلانى اقع على الأرض على ضهرى ورجلي اليمين جت على الباب الخاص بقائد السيارة وبعدين شوفته هو باصص ناحيتى وبيشتمنى بالفاظ نابية وبعدها قومت على طول ولقيته كمل مشي بالعربية وقدرت انى اخد رقم العربية وحررت مخالفات ضده، وبعدها فضلت واقف في مكان خدمتى وبعد الواقعة دى بحوالي نصف ساعة لقيت الطفل سواق العربية المرسيدس وصحابه كانوا معاه جايين ناحيتى على رجليهم من غير العربية واحد منهم ماسك تليفونه وعمال يصورنى وكلهم عمالين يهددونى ويستفزونى "احنا مش هنوقفك هنا تانى وهنقعدك جنب امك وممكن نضربك وبعدها خدوا بعضهم ومشيوا وانا معملتش ليهم حاجة، وبعدها بحوالي نص ساعة تقريبا جالى الطفل سواق العربية المرسيدس ومعاه صحابه كانوا ساعتها راكبين العربية المرسيدس ولقيت الطفل وهو قاعد خلف الدركسيون بيعتذرلى ويقولى " انا اسف يا عمو وحقك عليا" وانا قولتله خلاص حصل خير وبعدها الطفل خد بعضه وصحابه والعربية ومشى وده كل اللى حصل.

س/ متى وأين حدث ذلك تحديدا؟

الكلام ده يوم 26 أكتوبر 2020 حوالى الساعة 12 ظهرا بميدان بيشو – زهراء المعادى – دائرة قسم شرطة البساتين.

س/ ما الإجراء الذى اتخذته تجاه هؤلاء الأشخاص مستقلي السيارة؟

ج/ أنا فضلت مصمم على طلبى الرخص من الطفل قائد السيارة ولقيته بيسألنى انت فين كمامتك فقولت له مش معايا كمامة فقالى ساعتها ابعد وشك عنى وابعد ايدك عن العربية.

س/ ما هو سبب وكيفية سقوطك أرضا؟

 ج / بسبب قيام الطفل قائد السيارة بالتحرك بها مسرعا وبسبب أنى كنت واقف جنبها فقام بتهويشي فوقعت على الأرض، ووقعت على ضهرى على الأرض ورجلى اليمنى جات على باب قائد السيارة.

س/ ما صلتك بالمقطع المعروض عليك الآن؟

ج/ دة المقطع الخاص بالواقعة بتاعت الطفل اللي تعدى عليا واللي كان سايق المرسيدس.

س / وما هي طبيعة علاقتك بالمتهم الطفل أحمد أبوالمجد وهل من ثمة خلافات سابقة فيما بينكما؟

ج /أنا معرفوش قبل كده، وأول مرة أشوفه ساعتها.

س/ وما قصد المتهم ورفقائه من ارتكاب الواقعة محل التحقيقات؟

ج/ قصدهم التعدي عليا بالسب والشتم والسخرية وتصويري دون موافقتي واسفتزازي للوقوع في الغلط.

س / كيف وقفت على ذلك القصد؟

ج/ عشان العبارات اللي وجهوها ليا ولما صوروني.

س/ من هو مالك السيارة محل الواقعة؟

ج/ العربية كشفنا عليها في الإدارة العامة للمرور قسم الحاسب الآلي، وتبين أن رخصة السيارة منتهية من شهر مارس لعام 2015 والسيارة مسجلة بوحدة مرور المعادي باسم أبوالمجد محمد.

س/  وهل تتهم المتهم الطفل أحمد أبو المجد ورفقائه بثمة اتهامات؟

ج/ آه بالإساءة لي والتشهير بي على فيس بوك، والتعدي عليا بالسب والشتم والسخرية مني.

سِ/ ما طبيعة ألفاظ السب التى وجهها إليك المتهم آنذاك؟

ج / غور كدة وشتمني بأمي.