"راجل و2 ستات" يناقش هل تعيش المرأة من أجل زوجها فقط.. شيريهان أبو الحسن تقدم نصائح للسيدات للسعادة فى الحياة الزوجية.. هيدى كرم: لازم يكون عندك نجاح خاص.. ونهال عنبر: المرأة ميزان البيت.. فيديو

ناقش برنامج "راجل و2 ستات"، المذاع على قناة ON، تقديم الإعلامية شريهان أبو الحسن والفنانتين نهال عنبر وهيدى كرم، سؤالا عن "هل تعيش الزوجة من أجل زوجها فقط"؟.

فى البداية، قدمت الإعلامية شريهان أبو الحسن، عددا من النصائح للسيدات حتى يستطعن استكمال حياتهن بسعادة مع أزواجهن.

وقالت شريهان أبو الحسن، خلال تقديمها البرنامج بصحبة الفنانتين هيدى كرم ونهال عنبر: "الوقت بتاعك أنتى اللى تملكيه.. لابد أن يكون لكى وقتك الخاص ولازم تنتبهى لأهمية طموحك وأنتى نفسك فين من الحياة.. حتى ولو سيدة مش عاوزة تشتغل ولكن هناك عائلة وأصدقاء لابد من خلق حياة خاصة ليكى لأن بعد شوية السيدة هتبقى مش مبسوطة بسبب الروتين اليومى".

وأضافت هيدى كرم: "لو عاوزة تجوزى وتخلفى ده حقك.. لكن لابد أن يكون ليكى نجاح خاص.. ومش لازم نخلف 3 عيال ورا بعض ولابد من التنظيم فى الحياة".

وقالت الفنانة نهال عنبر: "السيدة ميزان البيت ولابد أن تخلى بالها من زوجها.. والمرأة مش واخده الحياة تحدى ما بينها وبين زوجها.. وتخلى بالك من بيتك وواجباتك لازم تعمليها على أتم وجه".

وأضافت: "هل السيدة تفنى حياتها من أجل زوجها.. هناك سيدات بتقعد فى البيت وبتطلع أولادها فى مناصب مهمة، وفي سيدات ممكن تسيب كل حاجة من أجل زوجها".  

وعلقت الإعلامية شريهان أبو الحسن: "في سيدات بتحب قعدة البيت ومش بتحب تشتغل ولو الست معندهاش طموح مهنى ده يبقى عادى بالنسبة لها ومش عيب".

وأضافت الفنانة هيدى كرم: "غلط أن الست تسيب كل حاجة عشان تبقى مع زوجها فقط، وكل سيدة تتحمل قرارها، والسيدة لو مبقاش عندك حياة غير زوجك وبيت وأولادك ومع الوقت هيسبب مشكلة نفسية بسبب أن الأطفال عندما يكبروا مش هيبقى محتاجينك ولابد من أن تجدى حاجة لسد هذا الفراغ".