"اليوم السابع" يواصل نشر نص تحقيقات "طفل المرور".. مصور الواقعة: "أحمد قالى صور علشان يورى أبوه إن أمين الشرطة هو اللى كسر مراية العربية وبعته على تليفونه ومنشرتش حاجة".. ويؤكد:"هو اللى شتم الأمين وأنا متكلمتش"

يواصل "اليوم السابع" نشر نص تحقيقات جهات التحقيق مع المتهم مصطفى تامر أحد أصدقاء طفل المرور ومصور مقاطع الفيديو، فى القضية المعروفة إعلاميًا بـ"طفل المرور"، والتى وجهت فيها اتهامات للطفل بالاعتداء والتنمر على فرد شرطة، وظهوره فى مقطع فيديو على مواقع التواصل الاجتماعى، خلال سبه الآخرين بألفاظ نابية هو و4 آخرين من أصدقائه.

وجاءت نص التحقيقات وأقوال صديق طفل المرور ومصور الواقعة كالتالى:

س/ أسمك وسنك؟

ج/ "مصطفى ت ع" ، 17 سنة، طالب بالصف الثالث الثانوي

س/ ما قولك فيما هو منسوب إليك أنك متهم وآخرين بإهانة أحد رجال المرور بالقول والتهديد أثناء تأديته لوظيفته حال طلبه رخص السيارة من المتهم أحمد أبو المجد؟

ج/ محصلش أنا مشتمتش حد ولا اتكلمت مع أمين الشرطة واللى شتم هو أحمد أبو المجد.

س/ ما قولك فيما هو منسوب اليك انك متهم باستخدام حساب خاص على موقع "فيس بوك" بهدف ارتكاب جريمة يعاقب عليها القانون بنشر مقطع مرئي خاص بتعدى المتهم أحمد أبو المجد على أمين الشرطة؟

ج/ محصلش أنا فعلا صورت الواقعة بتاعة أحمد وأمين الشرطة وبعتها لأحمد على تليفونه الخاص به ومنشرتش حاجة على الفيس بوك.

س/ ما الذى حدث إذًا وما أوجه دفاعك؟

ج/ اللى حصل إن أنا يوم الواقعة كنت مع صاحبي رامز عصام في بنزينة قاعدين في كافيه جوه البنزينة.. ودى مكانها في ميدان بيتشو في أول طريق العين السخنة.. وكان موجود يوسف أبو عوف وعمرو أحمد وأحمد أبو المجد، كانوا قاعدين مع بعض وبعد كده روحت أنا ورامز وقعدنا معاهم ربع ساعة.. وبعدها أحمد قالنا أنه هيخرج يجيب اكل ولقيت أحمد جاي ومعاه عربية مرسيدس بيقول انها بتاعت صاحب والده.. فركبنا معاه وأول ما خرجنا من البنزينة لقينا أمين الشرطة وقف أحمد وكنت مشغل ستورى كملت تصوير.. بعديها أحمد مرضيش يقف وكمل مشى .. فأمين الشرطة خبط بإيده الشمال المراية الشمال للعربية، فأحمد وقف بعديها بشوية والأمين جه ناحيتنا وسال احمد على الرخص وقاله مش معايا وقاله فين كمامتك ، فالأمين قاله مش معايا واحنا قعدنا نضحك وسأله على الرخص تانى وقاله اركنلى على جنب فأحمد مرضاش ومشي بالعربية وامين الشرطة رفع رجله اليمين وخبط الباب بتاع العربية فاحمد شتمه بأمه وبعدها قفلت تصوير الفيديو.

س/ إلى اين توجهتم عقب ذلك؟

ج/ احنا مروحناش في حتة.. أحمد عرف ساعتها أنه غلط في أمين الشرطة ولف الناحية التانية ورجع لمكان وقوف الأمين.

ملحوظة: قمنا بفحص الهاتف الخلوى ملك المتهم وتبين وجود ثلاث فيديوهات وصورتين خاصة بالواقعة.

س/ ما صلتك بالمقاطع المرئية والصور المعروضة عليك؟

ج/ الفيديوهات الثلاثة دول خاصين بواقعة المشكلة مع امين الشرطة والفيديو الأول وقت لما كنا كلنا راكبين العربية المرسيدس ، والأمين وقف أحمد وطلب الرخصه منه وأحمد شتم الأمين في الفيديو ده، والفيديو التانى كان بعد ما أحمد شتم الأمين وجرى ، وقفنا بعيد ونزلنا كلنا روحنا للأمين نتكلم معاه والفيديو التالت برضه وقت ما كنا واقفين نتكلم مع الأمين برضه والصورتين دول أنا واخدهم سكرين شوت ودول صفحات على الانستجرام نشروا الواقعة بتعاتنا.

نص تحقيقات طفل المرور

س/ ما الذى دعاك إلى تصوير تلك المقاطع؟

ج/ المقطع الأول أتصور صدفة لما كنت فاتح الاستورى بتاع الانستجرام والمقطعين التانيين أنا صورتهم بناء على طلب أحمد أبو المجد.

س/ ولم طلب منك المتهم أحمد ذلك؟

ج/ هو أحمد قال كدة علشان يوري لأبوه أن أمين الشرطة هو اللى كسر مراية العربية.

س/ ما المقصود بالعبارة الواردة بالمقطع الثانى على لسان المتهم أحمد "العربية ديه عليها حصانة"؟

ج/ هو أحمد قال الجملة دى لأمين الشرطة بس ممكن يكون كان قصده لما الأمين كسر المراية بتاعة العربية.

س/ ومن القائل عبارة " أنا بصور اللقطة لوالده وبس"؟

ج/ أنا اللى قولت كده لأنى كنت انا اللى بصور بتليفوني بناء على طلب أحمد أبو المجد.

س/ ولماذا تم تصوير الفيديو الثالث؟

ج/ صورت جزء من الاعتذار كان مدته 9 ثوانى بس أنا مسحته من على التليفون والكلام ده كان يوم الخميس اللى فات.

س/ وضح لنا ما سبب إرسالك المقاطع والصور للمدعوة حبيبة صالح؟

ج/ أنا وهى كنا بنتكلم الصبح وكنت بقولها انى مش هقدر اجى الدرس النهاردة علشان مطلوب للمحكمة.. فسألتنى ليه؟ قولتلها علشان موضوع امين الشرطة وبعتلها الفيديوهات علشان كدة.