رامى وحيد: مهرجان القاهرة هايل وبحضر كل يوم.. وعن مشواره الفنى: بشتغل بمزاجى

رصدت كاميرا تليفزيون اليوم السابع، السجادة الحمراء الخاصة بالفيلم المصرى "عنها" للمخرج إسلام العزازى فى اليوم السابع من مهرجان القاهرة السينمائى الدولى فى الدورة 42 المقام بدار الأوبرا المصرية، كما حضر جميع صناع الفيلم. وأجرت الزميلة شروق وجدى لقاء مع الفنان رامى وحيد لتليفزيون اليوم السابع، أثناء تواجده على السجادة الحمراء لفيلم "عنها".

وعن رأيه في مهرجان القاهرة السينمائى في دورته الـ 42 قال: "المهرجان حلو أوى.. وهايل والناس لحد آخر حفلة لابسة الماسك.. والالتزام هايل والتنظيم جيد على كل المستويات.. وإحنا بنحاول نبقى شكلنا حلو إحنا كمان".

وعن الأفلام التي نالت إعجابه خلال المهرجان قال رامى وحيد: "أنا بحضر تقريبا كل يوم علشان كنت بتمرن، شوفت فيلم THE FATHER  وشوفت فيلم عاش يا كابتن وفيلم عظيم والمخرجة عظيمة وهايله، وحضرت عرض فيلم دنماركى هايل والفيلم عظيم".

وتابع: "مستوى المهرجان بيعلى على مستوى الأفلام.. والنجوم اللى حضروا المهرجان نجوم كبار".

وعن أكثر شائعة ضايقته قال رامى: "في كلمة بتضايقنى جدا.. اللى هي ملامحك خلتك تعرف تبقى بتأدى أدوار الشر أو الخير.. واللى بيضايقنى اننا نبقى حادين جدا في آرائنا.. كلنا بنغلط احنا بشر".

وعن أعماله القادمة قال إنه يحضر حاليا مع المنصات لعملين مهمين، وأضاف: "أنا بشتغل بمزاجى .. يعنى ممكن أعمل حلقة واحدة في مسلسل.. وببقى مبسوط جدا أنه اتشاف حلو .. وببقى مركز أنها حلقة فتتعمل حلو جدا وده اللى حصل في مسلسل إلا أنا اللى ردود الفعل كان أفضل ما تخيلت، موضحا أن مسلسل " إلا أنا " يتوافق مع رؤية والإرادة السياسية للدولة والقيادة السياسية للاهتمام بالمرأة.

ووجه الفنان رامى وحيد رسالة لتليفزيون اليوم السابع قائلا: "مبروك تليفزيون اليوم السابع.. مبروك التألق.. اليوم السابع مؤسسة كبيرة والأستاذ خالد صلاح رجل محترم وصديق وبباركله على كل الحاجات الحلوة المحترمة اللى بتحصل.. متوقع النجاح ليكم".

وعن العام الجديد قال: "كل سنة وانتوا طيبين.. يا رب السنة الجديدة سنة مفيهاش وباء . وسنة خير وربنا يباركلنا كلنا في صحتنا وناخد بالنا اننا نقوى مناعتنا وناكل كويس وننام كويس وشكرا لـ"اليوم السابع".