هدايا العشاق فى عيد الحب.. بائع: الأسعار زى ما هى ومفيش زباين بسبب الإجازة

تعتبر الدباديب من الهدايا الكلاسيكية في عيد الحب، حيث يوجد دبدوب باندا وآخر لونه أبيض يحمل قلب أحمر، ويتغنى بكلمات رومانسية، وثالث متعدد الألوان، وغيرها من الأشكال المختلفة المتوفرة بأحجام تبدأ من الصغير بحجم كف اليد والمتوسط وأخر كبير، وبأسعار تحدد حسب الحجم والخامة المصنوع منها الدبدوب، الذى يتجدد شكله سنوياً، وهذا العام، ظهرت مجموعة من الدباديب المختلفة التي تعود لذكريات الطفولة مثل توم وجيرى وميكى ماوس وفلافيلو بجانب الباندا والدبدوب الأحمر الذى يعتبر من أشهر هدايا عيد الحب.

هدايا الفلانتين 

قال سيد مجاهد، صاحب إحدى محلات الهدايا بمحافظة الجيزة، :" أنا بقالى 25 سنة شغال في المهنة دى، وكل سنة بيبقى فيه جديد، والسنة دى الأسعار زى السنة اللى فاتت، وبتتراوح مابين 50 أو 60 لحد 150 جنيه وأكتر حسب حجم الدبدوب، واللى بترضى أذواق الزباين كلها  في عيد الحب".

هدايا الفلانتين

يهتم عم سيد، بتزيين محله بالزهور الحمراء التي يبيعها أيضاَ بجانب الدباديب التي وضعها بترتيب مميز، بإحدى أركان محله الذى زينه بالورق الأحمر بمناسبة عيد الحب، وأشار إلى إن هذا العام مميز من حيث الأشكال الجديدة للدباديب، حيث قال :" السنة دى فيه أشكال جديدة من الدباديب، منها فلافيلو لونه روز وباندا لابس تى شيرت وطاقية، لكن الدباديب مش من الهدايا الأساسية في عيد الحب، لأن الزباين بتهتم أكتر بشراء الورد، لكن أكتر دبدوب بيتباع عندى هو الباندا وفلافيلو، لأن الزباين بتروح دايماً لكل حاجة جديدة ومختلفة".

هدايا عيد الحب

وعن الإقبال على هدايا عيد الحب، قال مجاهد:" الزباين قليلة السنة دى، عشان عيد الحب جاى يوم جمعة، و ده إجازة رسمية على مستوى المدارس والجامعات والمصالح الحكومية كمان، وبالتالي مفيش زباين كتير زى كل سنة ".