أيمن بهجت قمر بعد ردود الأفعال على اعتزاله: مش أى حد بيشوف المحبة دى فى حياته

أيمن بهجت قمر

كتبت مريم بدر الدين

الأحد، 16 فبراير 2020 05:18 م

عبر المؤلف أيمن بهجت قمر عن سعادته الكبيرة بردود الأفعال بعد إعلانه اعتزال تأليف الأغانى نهائيًا والتركيز على السينما والدراما والمسرح، من خلال حسابه على موقع "فيس بوك"، حيث كتب: "مش أي حد بيشوف المحبة دي في حياته وهو عايش.. غمرتوني بحب كبير كتر ألف خيركوا".

فيما انهالت عليه التعليقات المؤكدة على مكانته الكبيرة من النجوم، حيث قالت الفنانة ريهام عبد الغفور: "طب بنحبك أوي جدًا خالص بس كمان عارفين قيمتك لإن مفيش منها كتير"، فيما قال الكاتب عمرو سمير عاطف :"أنت واضح كده انك مش مقدر قيمة نفسك أنت كبير قوى يا أيمون".

أيمن بهجت قمر

وكتبت الكاتبة والستايلست إنجي علاء: "من إمبارح كل ما كتب كومنت ألاقي حد بيكتبه.. فنك يا أستاذ فريد من نوعه والناس هتخسر كتير بالقرار ده بس في نفس الوقت مقدرة التوتر اللي بيسببه وحقك على جمهورك إنك تكون مرتاحًا ومبسوطًا بس تراجع بقى"، بينما كتب مدرب مرمى حراس منتخب مصر أحمد ناجي: "أمال أنت فاكر أيه يا عبقرى أنت حاجة كبيرة أوي"، كما قال الفنان كريم أبو زيد: "دانتا حببنا الغالي وأهم كتاب جيلك".

وكان أيمن بهدت قمر كتب أمس: "بقالي فترة مش صغيرة بفكر جديا في اللي هقوله دلوقتي أنا قررت إن أغنية مهرجان هي آخر أغنية أنا هكتبها وخلاص هعتزل تأليف الأغاني.. هكتب أفلام مسرح مسلسلات لكن خلاص هبعد عن مجال الموسيقى هنتج بس".

وتابع: "أنا بقالى 28 سنة بكتب أغاني وطول الوقت في توتر وضغوط، عاصرت أجيال كتير من ١٩٩٢ لحد دلوقتي، وخلاص قررت أرتاح من السبق ده، أنا آسف مش هرد على أى زميل يتصل بيا عشان محدش يأثر عليا".

جدير بالذكر أن آخر أعمال أيمن بهجت قمر الغنائية هي مشاركته في ألبوم عمرو دياب الأخير من خلال كتابة أغنية حملت اسم "مهرجان"، بينما آخر أعماله في عالم الكتابة الدرامية تأليفه لمسلسل "فالنتينو" الذي يقوم ببطولته الزعيم عادل إمام، والذى من المفترض عرضه خلال شهر رمضان القادم.