عمرو أديب للأمهات: عيالكم تقعد في البيت.. لا نوادى ولا تمارين ولا دروس خصوصية

علق الإعلامى عمرو أديب، على قرار تعطيل الدراسة خلال الأسبوعين القادمين، قائلا: "بقالنا 3 شهور المواطنين والأمهات والطلبة بيقولوا حرام عليكم.. وقفوا الدراسة.. وبعد قرار اليوم بدأ المصريين يسألوا نعمل إيه في العيال.. يا جدعان أنتوا مين فيهم.. مش عاوزين العيال في حضنكم.. أول ما القرار طلع سمعنا الصراخ في الناحية التانية".

وقال "أديب" خلال برنامجه "الحكاية"،: "إيه معنى إنكم توقفوا أولادكم من المدرسة فتروحوا بيهم النادى.. لو هياخدوا كورونا ياخدوها في المدرسة محراب العلم.. معنى إن مفيش تعليم إن العيال تقعد في البيت".

وواصل قائلًا:"عاوزين تروحوا النادى وتجمعوا العيال مع العيلة كلها.. وتعملوا عشا وغدا؟.. طيب عملنا إيه؟..  قرار التعطيل هدفه تقليل الاختلاط.. أهنئوا بأولادكم.. الواد زى الجن ولا القرد.. دا كان مطلب جماهيرى.. وكل يوم مطالبات بتعطيل الدراسة.. طيب زيكم زى العالم كله.. ففرنسا أغلقت كل الكافيهات والمطاعم.. لكن المصريين موجودين في المطاعم بشيشهم وعددهم.. ياجماعة انصاف الجلول جريمة.. عاوزين نعمل الصح ولا نهزر.. لو هنهزر يبقى نكمل التعليم .. المقدرات دى مش في الأرض.. اللى كان في الجامعة يروح بلده ويقعد مع أهله في بيته عشان القرار يجيب نتيجة".

وتابع: "قرار تعطيل الدراسة لتجلس الأسرة في البيت وتقلقل الاختلاط والناس في الشارع وكل مكان.. ولا تمرين ولا نادى ولا مراكز دروس خصوصية.. القرار عشان العملية متضربش من تحت.. إما الالتزام أو الناس ترجع الدراسة تانى"، مضيفًا:" لو أنا متخذ قرار ووجدت المولات والنوادى والأتوبيسات على بعضها.. لا دا أنتوا ترجعوا التعليم من يوم السبت اللى جاى.. هذه الأشياء لا تتسق مع تقليل الاختلاط".