من القاهرة للإسماعيلية.. كيف قضى الطلاب أول أيام تعليق الدراسة؟

الأحد 15 مارس أول أيام تعليق الدراسة في الجامعات والمدارس لمدة أسبوعين تنفيذًا لقرار رئيس الجمهورية عبد الفتاح السيسي فى إطار الإجراءات الاحترازية للدولة لمواجهة أية تداعيات محتملة لفيروس كوورنا المستجد. مع توصيات للأهالى بضرورة الابتعاد وتجنيب الأبناء التجمعات والتزام البيوت، وتوصيات من وزارة التربية والتعليم بالاعتماد على بنك المعرفة ومتابعة الدراسة من المنزل. فكيف قضى الطلاب هذا اليوم بالفعل؟ 

في أول يوم إجازة بعد تعليق المدارس أسبوعين

القاهرة

تقول نادية محمد طالبة في الصف الثالث الثانوي قسم الأدبي بإحدى مدارس مدينة العبور: سعدت كثيرًا بقرار تعليق الدراسة، وهذه فرصة عظيمة كي أنجز ما تراكم عليا من دروس فائتة خاصة أنه قد تم إغلاق سناتر الدروس الخصوصية، ولكن اليوم استيقظت مبكرًا وانتهزتها فرصة كي أساعد أمي في بعض أعمال البيت وبعدها سأخلد للنوم ساعتين ثم أستيقظ للمذاكرة .

في أول يوم إجازة بعد تعليق المدارس أسبوعين

أما دهب ولية أمر لاثنين من الطلاب في المرحلة الثانوية فقالت" الولاد فرحانين جدًا بالإجازة وفضلوا سهرانين امبارح في الحارة مع اصحابهم للساعة 12 باليل وطبعًا صحيو بعد الظهر، بعدها بساعة تقريبًا كل واحد مسك له كتاب وقعد يقرا فيه شوية، وبعد كده هيروحوا الدروس اللى في البيت لأن السناتر قفلت، هو هيكون صعب نسيطر عليهم بس المهم إنهم يذاكروا في حته في البيت أو الدروس ".

وقالتياسمين محمد أم لطفلين ميرا 4 سنوات وماهر 3 سنوات " حاولت السيطرة على الولاد عشان اقنعهم أن مافيش حضانة النهاردة بالعافية، صحيوا بدرى كالعادة وعملوا البيت حضانة وعملوا شقاوة طول اليوم لكن في جميع الأحوال كده أحسن طبعًا من الخطورة اللى ممكن يتعرضوا ليها إذا راحوا الحضانة"

اطفال الحضانة

 الشرقية

قالت دعاء محمد الشحات من محافظة الشرقية أن أولادها فرحوا كثيرًا بالقرار على الرغم أنهم منذ ما يقرب من أربعة أيام سابقين لم يذهبوا إلى المدرسة بسبب حالة الطقس وأكدت" أول ما سمعوا القرار فرحوا وسهروا طول الليل كأنها ليلة عيد، وطبعًا صحيوا متأخر اللى راح الدرس واللى قعد قدام التليفزيون، والبنت بس ماسكة الكتاب وقعدت تذاكر، وفي عيال كثير جيراننا اهتموا وصحيوا بدرى وراحوا الدروس ".   

وقالت إيمان شعبان طالبة في الصف الأول الاعدادي "انتهزتها فرصة وصحيت بدري عشان أذاكر مادة الإنجليزي، المهم إني أقدر أخلص كل الدروس اللى فايتانى والحمد لله أن دروس البيت لسة شغالة عشان أرجع للمدرس لو في حاجة مافهمتهاش".

في أول يوم إجازة بعد تعليق المدارس أسبوعين 

الإسماعيلية

أما ملك ماجد طالبة في الصف الخامس الابتدائي قالت" صحيت بدرى جدًا عشان أذاكر مادة القصة بس أنا بذاكر قدام التليفزيون عشان أنا مابعرفش أذاكر في الهدوء وبعها هذاكر العلوم"، لكن في كتير من اصحابي في المدرسة بيلعبوا وفى كمان بيذاكروا كل واحد عارف مصلحته فين " .

في أول يوم إجازة بعد تعليق المدارس أسبوعين

وقالت ياسمين أعطاف طالبة في الصف الثاني الثانوي أدبي" صحيت الساعة 10,30 صباحا ساعدت ماما في البيت وبعدين قعدت أذاكر. أنا عاوزة أخلص الجغرفيا النهاردة الحمد لله  أن الدروس في البيت ماتلغتش عشان نرجع للمدرسين لو مش فاهمين حاجة، ولكن أنا أعرف بنات دلوقتى قعدين بيتفرجوا على المسلسلات الكوري" .

في أول يوم إجازة بعد تعليق المدارس أسبوعين 

أما مهند عبد العاطى  طالب في الصف الأول الثانوي فقال" أحسن حاجة الإجازة أنا هلعب دور ببجي وبعدين هذاكر ".

في أول يوم إجازة بعد تعليق المدارس أسبوعين 

وقال إسلام محمد أحمد سنة أولي بالمعهد العالي للحاسبات بالتجمع الأول" أنا دلوقتي في طريقي لقريتي أبو سلطان في الإسماعيلية هقضى الإجازة كلها هناك، أول ما أوصل هفتح المحل وأرص بضاعتى وابدأ شغلي وهاخذ معايا كتاب أذاكر شوية، لكن بالليل اقعد أذاكر بتركيز".

وقالت أسماء محمد في الصف الثاني الثانوي علمي " صحيت الساعة 9 وبعد الفطار مسكت التليفون أفتح شوية الواتساب وشوية الفيسبوك أكلم صحابي واشوف حالتهم وعاملين إيه واتفرج على الفيديوهات على الفيسبوك، لكن المذاكرة دى بالليل مابحبش اذاكر الصبح، أنا بذاكر دروسي أول بأول عشان ما فيش حاجة تتراكم عليا". 

 وقالت أسمى أحمد في الصف الرابع الابتدائي"أنا انهاردة هتفرج على التليفزيون وبعدين هعقد أذاكر".

في أول يوم إجازة بعد تعليق المدارس أسبوعين 

بورسعيد

قالت وفاء أبو الحسن ربة منزل ولديها أربعة أبناء" من الطبيعى أن الولاد هيصحوا متأخر مافيش لأن ما فيش مدرسة، والسناتر مقفولة بس هنحاول نلزمهم بالمذاكرة قدر المستطاع أغلب الوقت هيضيع في اللعب، لكن مهما كان أفضل من الخطورة اللى ممكن يتعرضولها لو راحوا المدرسة أو الجامعة ".

في أول يوم إجازة بعد تعليق المدارس أسبوعين