الأم المثالية بأسوان: "أبنائى 3 أطباء.. وفرحت ونسيت تعب السنين لما اختارونى"

هى أم لـ 3 أبناء جميعهم أطباء " الحسن 30 سنة، طبيب جراحة متخرج من طب أسيوط، والحسين جمال أبو الزيد، 24 سنة حاصل على طب أسنان جامعة القاهرة، والزهراء جمال أبو الزيد 32 سنة دكتورة مدرس بكلية الطب فى أسوان وهى الآن فى بعثة فى كندا، وكانت طالبة بطب أسيوط" هى عايدة عبد الشكور، 59 سنة، رئيسة العلاقات العامة بإدارة دراو التعليمية، موظفة بالشئون الاجتماعية بدراو، ومقيمة بنجع الشيخ عامر الأنصارى بمركز دراو شمال محافظة أسوان.

قالت عايدة لـ "اليوم السابع": "فرحت جدًا لما أبلغونى إنى الأم المثالية بأسوان، وحسيت أن تعب السنين راح فى ثوانى أنا أم لـ3 أطباء أبوهم متوفى من عام 2005 كان أصغر ابن عندى فى 6 ابتدائى، تحملت الصعاب خاصة لما كان المعاش الخاص بأبوهم 700 جنيه وكنت بشتغل وتعبت عشان اصرف عليهم لكن للأمانة هم كمان كانوا متفوقين ودخلوا المدن الجامعية ووفروا لى كثير والحمد لله ربنا أكرمنى بهم، وشفتهم أطباء والبنت دكتورة جامعية بتدرس فى طب أسوان".

وتابعت عايدة: "أنا قدمت بالصدفة، لن موظفة فى الشئون الاجتماعية بدراو قالت لى السنة اللى فاتت لازم تقدمى لأنك ينطبق عليكى الشروط ولازم نختارك أم مثالية، و السنة دى قالت هات الأوراق وقدمتها لهم من شهور، والشئون الاجتماعية فى تضامن أسوان كانوا عندى فى البيت وسألوا وشافوا الأوراق المطلوبة والحالة وأبلغونى اليوم بأنى الأم المثالية، وقالت أم الأطباء نصائح للتعامل مع "الكورونا" كإجراءات احترازية وهو الاهتمام بالصلاة والوضوء فى مواعيدها ومتابعة أذكار الصباح والمساء بالإضافة استمرار أعمال النظافة والكلور والمطهرات فى كل مكان".