تامر حسنى ينصح جمهوره بأعمال إبراهيم الفقى ويوجهم لأولى خطوات النجاح

نصح نجم الجيل تامر حسنى جمهوره بضرورة مشاهدة فيديوهات الدكتور إبراهيم الفقى، خبيرالتنمية البشرية الراحل، إذا شعروا باليأس والتخبط في مستقبلهم، والمساعدة على النجاح في حياتهم الشخصية والعملية، كما نصح جمهوره بخطوة من أجل مساعدتهم على اتخاذ قرارات ناجحة في حياتهم.

ونشر النجم تامر حسنى على صفحته على موقع التواصل الاجتماعى "فيس بوك" مقطع فيديو لمحاضرة للدكتورالراحل إبراهيم الفقى بعنوان "الطريق إلى النجاح وإزاي تكون شخصية ناحجة في حياتك".

وقال تامر في التدوينة: "اللي عايز ينجح فيكم أو يخرج من أي فكرة محبطة بتراوده أو مش عارف يبدأ إزاي أو حواليه محبطين أو مستقل ومستضعف نفسه لازم يتفرج على الدكتور إبراهيم الفقي الله يرحمه وياريت لو تتابعوه كويس في كل حلقاته وافهموا كلامه كويس والله بيتكلم صح و كل حد نجح فعلاً هي دي الحوارات اللي بتبقى داخليه بين الإنسان ونفسه".

وواصل تامر حسنى: "وطلبي منكم حالاً كل حد يجيب ورقة و يكتب فيها حالاً (إن شاء الله أنا هنجح في كذا و يكتب اسم المجال أو الهدف اللي عايز يوصله ويسعى بكل مافيه من قوة ومرونة، يعني يكون صدره رحب وما يقفش ويحزن و يكتئب ويحقد لو الحاجة مجاتش من أول مرة أو من تانى وتالت مرة بس الأهم متضحكش على نفسك بحاجة مش فيك دور على اللي فعلاً جواك وبتحبه وتجيده ولما تعرفه اثقله وادرس عشانه لحد ما تبقى محترف فيه هتلاقيه هو كمان بيجيلك وبيفتحلك أبوابه.

وتابع النجم تامر حسنى: "عارف أن في كتير مننا مش عارفين هما عايزين إيه بس ده طبيعي متقلقوش بس لازم تدوروا وتاخدوا قرار انطلاق من دلوقتي أنكم تفهموا وتستقروا عايزين إيه و عادي لو لقيتوا سكة مقفولة جداً من كل حاجه جربوا تاني وتالت ولو مقفولة لسه يبقى جايز ربنا مش كاتبلك خير فيها بما إنك عملت اللي عليك، يبقى لازم تدور في حلم تاني زي مأنا كنت متخيل أني لازم اطلع لاعب كرة قدم و زعلت لما معرفتش أحقق الحلم ده فا بسرعة روحت لحلم تانى واتاري ربنا كان كاتبلي فيه مستقبل أحسن ليا والله العظيم متأكد ان كلامي هيكون إشارة واضحة زي الشمس لناس كتير فيكم انها تبدأ".

يشار إلى أن نجم الجيل تامر حسنى يستعد لإحياء حفلا غنائيا تشاركه النجمة اللبنانية نانسى عجرم فيه، يوم 12 من شهر مارس الحالى بمنطقة الشيخ زايد بمدينة السادس من أكتوبر، وهى الحفل التي تنظمها شركة تذكرتى، ووجه منتصر النبراوى، رئيس الشركة، بضرورة خروج الحفل على أعلى مستوى، بالتعاون مع مصطفى طوقان مدير التطوير وأحمد عبادة وأحمد رفاعى مديرى العمليات.