مصطفى كامل: أولادى بيحبون شاكوش.. وصوته أحلى من أعضاء كتير فى النقابة

قال المطرب مصطفى كامل، نقيب الموسيقيين السابق، أن "المهرجانات نوع من المزيكا، ومن حق الولاد يغنوا زى شعبان عبدالرحيم، وكل من يصلح للغناء والأداء لازم ياخد كارنية ولكن فى حدود الآداب العامة".

وأضاف ، خلال حواره مع الإعلامية بسمة وهبة، مقدمة برنامج "كل يوم"، عبر شاشة on e": "، قائلا:"هاني شاكر صاحبي من 25 سنة، لكنه أخد قرار ورجع فيه، وكانت من ضمن مناشداتى إننا نهتم بأى صوت كويس زى شعبان عبدالرحيم وسعد الصغير، ونهتم بحسن الأداء، كنت أتمنى إن القرار يكون لجنة من خارج النقابة عشان يختبروا مغنى المهرجانات، عشان كان فى مطربين بيقولوا إنهم بيطلبوا يروحوا أفراح ببلاش لناس من النقابة".

وأكد، "الكلام ده قيل لى شخصيًا كما قالولى على الفلوس اللى اتطلبت منهم، وكلمنى مطرب عمل شوشرة على باب النقابة، وقالى على إن في 2 طلبوا منه 300 و400 ألف جنيه، ولما كنت النقيب كان عندى فرح مع مطرب، وقالى على عضو مجلس لازم يجيب له موبايلات شهريًا، والمطرب ده حي يرزق".

فيما انتقد المطرب مصطفى كامل، نقيب الموسيقيين السابق، قرار النقابة باستحداث شعبة جديدة لمُغني المهرجانات تحمل اسم "الأداء الفني".

وقال كامل، أى حد لو غنى بابا فين بابا هنا ده أداء فنى، وأمي لما بتقف فى المطبخ وتقول هل رأى الحب سكارى تاخد كارنيه؟".

وأضاف: "قلت إن كل من هو صوته جيد ومقبول يعني بيغني، معظم جيلنا نجوم سوبر ستار وأعضاء عاملين داخل النقابة ورقاصات معاها كارنيه عامل في النقابة، وناس مش بتشتغل الشغلانة ومعاها الكارنيه".