مصرية عائدة من أمريكا تروى تفاصيل رحلتها من نيويورك للحجر الصحى بمصر × 15 خطوة

روت مواطنة مصرية عائدة من نيويورك، وتدعى إيثار كمال، كواليس وتفاصيل رحلة عودتها من نيويورك، وحتى لحظة وصولها إلى الحجر الصحى فى مدينة مرسى علم، فى أحد فنادق العزل الصحى هناك، حيث ذكرت إيثار مراحل تركها لنيويورك، وحتى وصولها مرسى علم فى 15 خطوة.

وقالت عبر حسابها على "فيس بوك"..

إيثار كمال

تعالوا احكيلكم عن رحلتي للرجوع إلى بلدي مصر من نيو يورك.

الخطوة الأولى :

أجرت عربية علشان اسوق 4 ساعات لواشنطن. وقعدت امسح و انضف بالمناديل المعقمة كل حتى في العربية من الداخل.

الخطوة التانية:

أرجع العربية المستأجرة و اركب اتوبيس لمطار دالاس. عمري ما شفته فاضي ومهجور زي النهارده.

الخطوة 3 :

لبست ماسك لأول مرة. بقالي 24 يوم في البيت وفعلًا شيء غريب ازاي احنا بنتعود على اي حاجة؛ احساس أني حواليا ناس بقى غريب.

الخطوة 4:

رحت على مصر الطيران ومضيت ورقة أني موافقة على العزل في اي مكان تقرر الحكومة تعزلنا فيه. من يومين قرروا إن العزل بدل القاهرة هيكون في مرسى علم (مدينة سياحية على البحر الأحمر)

الخطوة 5:

اعدي من الامن (TSA) وغريبة انهم كانوا عادي مش قلقانين من المسافة، مقربين قوي و ولا حد منهم لابس ماسك، جوانتيات بس وطبعا كالعادة لازم يحسسوا أيديهم على حجابي.

الخطوة 6:

الركوب إلى الطيارة الزحمة جداً. مسحت بالمناديل المعقمة كل حاجة حواليا. المضيفات و المضيفين وزعوا علينا ماسكات لكل حد مش معاه . المفاجاة الحلوة إن أغلب المسافرين كانوا لابسين الماسك بتاعهم .

الخطوة 7:

بعد 11 ساعة و مشاهدة 4 أفلام، وصلنا مطار مرسى علم . كل20  شخص بس هم المسموح ليهم ينزلوا و يركبوا باص واحد كل مرة. وزعوا علينا ماسكات و كل الهاند باجز اترشوا.

الخطوة 8:

قاسوا لنا الحرارة قبل ما ندخل قاعة الانتظار. اكتر من مرة أذاعوا من فضلكم اقعدوا و بلاش تتجمعوا مع بعض.أنا رحت قعدت في ركن بعيد.

الخطوة 9:

استقبلونا بالورد و معجنات وشاي مية وعصير. اكتر العاملين لابسين زي الحماية من الميكروبات، والجميع لابسين ماسكات.

الخطوة 10:

بعد حوالي ساعة بعد وصولنا قاعة الانتظار (انا سمعت بس مش قدرة أأكد ان كان على الطيارة حوالي ٣٥٠ راكب) وصلت إلى غرفة الاختبار.

الخطوة 11:

الحقيقة مش عارفة ايه الاختبار بالظبط (ممكن يكون اختبار لمضادات الفيروس في الجسم) لكن هم شكوا صباعي و بعد 10 دقايق قالوا انا سليمة وتمام .

الخطوة 12:

عديت من الجوزات هوا، اخدت شنطي (اللي اترشت قبل ما تنزل على سير الشنط) وبعدين الجمارك. و بعدين رشوا الشنط تاني قبل ما يحطوها في أتوبيسات مكيفة. من الطيارة للاتوبيس حوالي 3 ساعات.

الخطوة 13:

الاوتوبيس اخد 15دقيقة علشان يوصل الفندق. و طلبوا مننا نملا ورقة بالمعلومات المطلوبة للأوتيل علشان ميحصلش اي زحام. الاتوبيسات وقفت طابور ونزلوا الناس من اتوبيس واحد واحد لتجنب الزحام. في الحقيقة انا انبهرت بالتنظيم، فاق توقعاتي.

الخطوة 14:

بعد حوالي 40دقيقة نزلنا من الباص بتاعنا و رشوا الشنط بتاعتنا للمرة التالتة واحنا كمان المرة دي رشونا و رشوا الجزم بتاعتنا من فوق ومن تحت. مش بهزر لو قلت انه في اقل من نص دقيقة أخدوا باسبوري و ادوني وثيقتين و مفاتيح اودتي

25 ساعة من ساعة ما سيبت شقتي في نيو يورك ووصلت الأوتيل على البحر.

الخطوة 15:

مفيش اي حد طلب مني أدفع أي فلوس و لا حتى طلبوا كارت الائتمان علشان أي حاجة زيادة ممكن اطلبها.. الأوضة فيها كل حاجة - مياة شاي قهوة صودا بكرات ورق تواليت . حاجات تكفي عيلة كاملة . فيه ترابيزات صغيرة بره كل اودة بيحطوا عليها الوجبات 3 مرات يوميا بانتظام.

واختتمت إيثار: "أنا سبت أحسن حاجة للآخر: المنظر الجميل على البحر.. انا بفكر يا ترى كام دولة عملت كده لمواطنيها علشان يرجعوا بلدهم؟..في الحقيقة عمل رائع يا مصر.. مصر وقفت الطيران رسميا الى 14 إبريل ، لكن الحكومة رتبت و نظمت طيارتين يطلعوا من واشنطون لاسترجاع مواطني مصر، وانا ركبت طائرة 4 أبريل ..والحكومة بتستخدم فلوس صندوق تحيا مصر علشان تدفع مصاريف العزل. ان شاء الله انا و أتمنى من المصريين اللي كانوا على الطيارة القادرين انهم يردوا الجميل ونتبرع للصندوق اول ما نوصل القاهرة بالسلامة."