أحمد خالد صالح عن شخصية النقيب يوسف فى الاختيار: مسئولية تجسيد بطل من أبطالنا صعبة

أكد الفنان أحمد خالد صالح، أنه فخور بدوره في مسلسل الاختيار، ومهما حاول أبطال العمل أن يوفي أبطال مصر حقهم لن يستطيعوا، لأنهم فعلوا من أجل مصر ومن أجل شعبها الكثير، وضحوا بأعمارهم من أجل مصر، وقال: "في العموم كشخص بيمثل لازم أصدق الشخصية أوي، والمختلف في الاختيار أن أحداثه حقيقية وحصلت وبطولاته كلنا عارفنها والعمل بيؤرخ بطولة كان لازم تتأرخ عشان ولادنا وولاد ولادنا يشوفوها، ويارب نكون قدمنا حاجة تعجب الناس".

وأضاف خلال مداخلة هاتفية مع الإعلامية هبة جلال، ببرنامج "التاسعة" الذي يذاع على القناة الأولى المصرية: "الفكرة كلها على بعضها صعبة، مسئولية تجسيد بطل من أبطالنا موضوع كبير ومش سهل خالص، والموضوع إنساني أكتر منه شخصية بتتقدم، والغل اللي جوانا كلنا كمصريين تجاه اللي بيهدد وطننا، والموضوع مكنش محتاج تحضير تمثيل، بقدر ما كان يحتاج إلى توصيل المشاعر اللي جوانا".

وقال: "قابلت النقيب البطل يوسف في الحقيقة، ووصل ليا الشعور اللي الأبطال دي كانت فيه في الوقت ده، ويارب أكون قدرت أوصل ربع اللي حصل في الحقيقة واللي الأبطال دي عملوه".