يسرا فى حوار اليوم السابع مع عمرو صحصاح: "خيانة عهد" درس للناس بأن الحقد والكره بيموت صاحبه.. وبنقلل من اللى بيحصل فى الواقع لأن الحقيقة أكتر بكتير.. تذكرت أمى وأنا بمثل مشهد وفاة ابنى.. ومسلسل الاختيار حلو أوى

منذ سنوات طويلة وتحفظ النجمة الكبيرة يسرا مكانتها في عالم الدراما التليفزيونية، لتظل إحدى أهم النجمات اللاتى ينتظرهن الجمهور كل عام، ليس فقط لموهبتها الاستثنائية ولكن لقدرتها على التلون والإختلاف في كل عمل تقدمه، وتقديمها لكل ماهو جديد، فضلا عن دفعها بالعديد من المواهب الجديدة سواء في عالم التمثيل أو التأليف وغيرهما.

النجمة الكبيرة يسرا تنافس خلال موسم دراما رمضان الحالي بمسلسل "خيانة عهد"، والذى حقق نجاح جماهيرى كبير للغاية منذ بداية عرضه وحتى الآن، يسرا حلت ضيفة عبر خاصية اللايف على "اليوم السابع"، مع الكاتب الصحفى عمرو صحصاح رئيس قسم الفن، لتجيب على العديد من الأسئلة المهمة المتعلقة بشخصية "عهد"، والتي تقدمها ضمن أحداث مسلسلها، فضلا عن كواليس العمل بشكل عام.

يسرا وعمرو صحصاح

النجمة يسرا في البداية تحدثت عن مشهد وفاة ابنها فى مسلسل "خيانة عهد" الذى ‏يجسده الفنان الشاب خالد أنور، حيث قالت: "كان مشهد صعب للغاية فضلت قاعدة ‏لوحدى رايحة جاية فى غرفتى وبفكر هعمله إزاى، وتحدثت مع المخرج ‏سامح عبد العزيز وعرفته إنى مش هصرخ ولا أصوت، وقلتله إنى هعمل ‏زى ما حصلى فى الحقيقة وقت وفاة والدتى لما جسمى كله أترعش، وقلتله ‏لو عاوز تضيف حاجة زيادة بعد كدة مفيش مشكلة، صورنا المشهد 3 ‏مرات ولكن طمع إننا نوصل لأفضل شكل مؤثر فيه".‏

يسرا فى مسلسل "خيانة عهد"

وتابعت يسرا حديثها قائلة: "أنا فعلا لما كنت بمثل المشهد ده بسبب الأحداث اللى حصلت ‏فى حياتى الفترة الأخيرة تذكرت كل شىء خاصة لحظة وفاة والدتى، حتى ‏المقبرة التى صورنا فيها كأنها حتة من مقبرة والدتى بنفس الهندسة والشكل، ‏وحسيت إن أمى معايا وقتها وبتطبطب عليا وشايفانى".‏

النجمة الكبيرة يسرا 

وعن ردود الفعل التى تلقتها من الجمهور وزملائها قالت يسرا: "أنا سعيدة جدا ‏بردود الأفعال التى تلقيتها من جمهورى، وزملائى من داخل الوسط الفنى، ‏وتلقيت عددا كبيرا من الرسائل على "الواتس آب" ولكننى لم أستطع الرد ‏على الجميع بسبب انشغالى بالتصوير حتى الآن، وبحب جمهورى جدا ‏وربنا يديم المحبة والاحترام بينى وبينهم".‏

يسرا فى حوارها مع عمرو صحصاح

وعن الرسالة التي تقدمها يسرا من خلال مسلسلها "خيانة عهد" قالت: فرحانة جدا لأنى حسيت إنى بقدم ‏حاجة مهمة للناس، لأن صراع الأخوات موجود فى الحقيقة ومذكور فى ‏القرآن الكريم من خلال قصة سيدنا يوسف، فعادى إن الصراع ده يحصل ‏فى الحياة الحقيقية، ما بين الأخوات وبعضها وما بين الأصدقاء، وشخص ‏تكون لديك ثقة تجاهه ويخونك، ومفيش سبب واضح لهذه الخيانة، وإحنا ‏بندى النموذج من خلال المسلسل مش عشان الناس تعمل زيهم ولكن ‏عشان نتعلم منعملش زيهم، ونقول للناس إن الكره والحقد بيموت صاحبه، ‏وعلى فكرة إحنا فى الأعمال الدرامية بنقلل من اللى بيحصل فى الواقع، لأن ‏للأسف الحقيقة أكتر من كدة بكتير، ويمكن اللى حصل ده سبب إنى حبيت ‏أعمل خيانة عهد لأنى بحب أعمل حاجات مش متوقعة.‏

وعن مدى رضاها بتغيير اسم المسلسل من "دهب عيرة" إلى "خيانة عهد" ‏قالت يسرا: "عجبنى جدا اسم (خيانة عهد) ومكنتش مصدقة إن اسمه بقى كدة ‏فعلا، لأنى عرفت فى نفس الوقت اللى عرف فيه الجمهور، وسبب سعادتى ‏بهذا التغيير إن الاسم له معنيان، فهل عهد ستتعرض للخيانة أم ستكون ‏هى الخائنة".‏

وعن كره الأخوات لبعضهم ضمن أحداث المسلسل، قالت يسرا: للأسف كما قلت إنه موجود فى الحقيقة، ‏وده بيكون منذ البداية من الطفولة، لأن العقد بتكبر مع الأطفال اللى اتخلقت ‏جواهم من صغرهم، وإن لم تمح هذه العقد من الصغر النفسية بتكون مش ‏كويسة وبتوصل لحالة المرض النفسى، وعشان كدة التربية عليها عامل ‏كبير فى نشأة الطفل، وده دور الأهل لأن حتى لو الأهل مجروحين وفى ‏مشاكل مش لازم يظهروا كل ده أمام أطفالهم حتى لا يزرعون العقد النفسية ‏داخل أطفالهم دون أن يشعروا.‏

وعن رؤيتها للفنانين المشاركين معها فى بطولة المسلسل، قالت يسرا :" حلا شيحة ‏عملت دور الشر بشكل حلو أوى وهايلة جدا، وبيومى فؤاد فى حتة مختلفة ‏خالص ولا عمره طلع فى عمل درامى بالطريقة دى، وعبير صبرى تحفة ‏بجد، وخالد سرحان مختلف تماما، حتى الشباب الجديد اللى معايا سواء ‏خالد أنور أو هنادى مهنى، أو تيام مصطفى قمر، بجد فريق عمل تقيل، ‏ومخرج بقدر سامح عبد العزيز أتقل فى الإحساس والمونتاج وكل حاجة، ‏بالإضافة إلى ورشة كتابة جامدة جدا بتوقيع أحمد عادل وأمين جمال.‏

وعن تعاونها مع المخرج سامح عبد العزيز قالت يسرا: "هو أول تعاون بينا ولكن ‏فرحتى كانت كبيرة أوى بأنى اشتغل معاه، ومبسوطة أكتر بالنجاح الذى ‏حققناه من خلال مسلسل خيانة عهد".‏

وعن مدى مشاركتها فى ترشيحها لبعض الفنانين المشاركين فى المسلسل قالت، اختيارات سامح عبد ‏العزيز حلوة، وكلنا كان عندنا إجماع واحد على كل اختيار حتى لما ‏رشحت حلا شيحة كان عندنا كلنا إجماع عليها، وجومانا مراد كمان، وكانت ‏اعتذرت وبعدين رجعت تانى خليتنى فرحت أوى برجوعها مرة أخرى.‏

وعن دور بيومى فؤاد قالت يسرا: بيومى فؤاد عمل دور جميل جدا وهو أنه بيحب ‏واحدة وعارف إن مفيش أمل فى هذه القصة أن تكلل بالزواج ورغم كل ده ‏بيفضل الراجل الجدع الشهم اللى واقف بجانبها ومفيش من ناحيته أى كره ‏أو ضغينة، ودى أصلا من سمات الراجل المصرى اللى حبينا نرجعه من ‏تانى فى مسلسل "خيانة عهد"، وكمان رغم إن كل فريق العمل فاق توقعاتى، ‏ولكن بيومى فؤاد أكثرهم لأن رغم الضحك والهزار إلا أنه عمل الدراما بشكل ‏حلو اوى.‏

وعن تشابه "خيانة عهد" بمسلسل "حياة الجوهرى" قالت، لا يوجد أى تشابه ‏تماما بين العملين ولا يوجد علاقة نهائيا لأن الظلم الذى تعرضت له حياة ‏الجوهرى مختلف عن "خيانة عهد"، وأنا دائما أشارك فى أعمال تكون ‏شخصية مختلفة عن الشخصيات التى جسدتها من قبل، ولا أحب أن أكرر ‏نفس الشخصية مرة أخرى.‏

وعن تعاونها مع المؤلف أحمد عادل الذى يخطو أولى خطواتها في التأليف، قالت يسرا، لم أخف من هذ التجربة لأن ‏لدى ثقة كبيرة جدا فى أحمد عادل، وعندى ثقة فى إحساسه وخبرته، ده ‏غير التفاهم الكبير أوى مع أمين جمال كاتب السيناريو والحوار ومعاه فريقه فى كل حاجة سواء صغيرة أو ‏كبيرة، والأهم من ده كله أن يكون الناس الموجودة بتحبك وبتحبها عشان ‏يطلع العمل بشكل حلو.‏

وعن متابعتها لمسلسلها فى شهر رمضان أو أيا من المسلسلات الأخرى، قالت، أنا للأسف بصور حتى آخر ‏رمضان وبشوف الحلقات بشكل متقطع ولكن حلقة وفاة ابنى شاهدتها 6 ‏مرات، وتابعت أيضا مسلسل "الاختيار" وعجبنى جدا، وحبيت مسلسل ‏‏"فلانتينو" على كل المستويات، وأستاذ عادل إمام ده كبيرنا كلنا، ولولا ‏انشغالنا فى التصوير كنا تكلمنا سويا، ولكن كل عائلة أستاذ عادل إمام ‏بيكلمونى بشكل مستمر وأرسلوا تهنئاتهم ليا على المسلسل.‏