القارئ محمد مجدى سليم يكتب: مخلقش حد فقير‎

تعرف إن ربنا سبحانه وتعالي ما خلقش حد فقير وسوانا كلنا كبني أدمين  .. فعلا إحنا كلنا متساوين.

حتي الفقير غني .. وغناه دا في إن عنده حاجة أكيد مش عند الغني وتخلي الغني يحتاجه دايما.

ولكن هو ربنا خلقنا طبقات.. يعني أنت لو معاك كنوز الدنيا في وقت بتلاقيك بتحتاج الراجل الخباز اللي بيخبز عيش حلو عشان تاكل.

وهتحتاج القهوجي عشان يعملك قهوة تستمتع بيها، وهتحتاج بتاع النظافة اللي هينضفلك، وهتحتاج الطباخ اللي هيطبخلك، وهتحتاج السواق اللي هيسوقلك عربيتك، والمندوب اللي بياخد راتب عشان يكسبك قدام راتبه أضعاف أضعاف، وحتي الزبال اللي فضله علينا إنه بيخلصنا من الزبالة االي لو اتراكمت هتموتنتا من الأمراض وإلخ ..

عشان كده في الحقيقة لو أنت اتعاليت علي فكرة إنك مش محتاج الناس دي وعملت كل حاجة بإيدك لنفسك علي مدار اليوم هتبدأ تهدر وقت كبير انت كنت بتكسب فيه مبالغ كبيرة جدا، وهتلاقي نفسك تدريجيا بتنزل بدرجة غناك لأنك بتخسر وقت كنت بتكسب فيه فلوس اكتر.. فعشان كده هتلاقي نفسك بتحتاج الناس البسيطه دي عشان توفرلك وقت تقدر تنتج وتكسب اكتر وتقدملك الي تحتاجه بشكل حلو وسريع بدون ما تعطلك في رحله حياتك.

وعلي فكره وياريت تحط تحت الجمله دي عشرين ألف خط لو حد من الناس البسيطه حاول يقلدك ويعمل نفس خطوات كسبك للمال بالظبط مش هيعرف يجيب النتيجه بتاعتك، لأن الرزق كله مش سعي فقط.. الرزق توفيق وسعي وصبر وحظ ومجموعه عوامل وتوليفه صعب فهمها، وربنا بيلهم بيها فقط الي بيختاره يبقي يد ليه في الدنيا ..

- هتسألني طبعا :- يد ليه في الدنيا !! ازاي يعني ؟؟.

هقولك يا سيدي ربنا لما بيختار يغني حد مالا فهو بيديله مسئوليه انه بيخليه يد ليه في الدنيا ترزق الناس بالشغل والمال.

والمسئولية دي مش سهله خالص وحسابها مع رب العالمين مش سهله اطلاقا .

فمثلا ذي بالظبط لما تعين حد امين خزينه عندك وتديله ملايين في الخزينه وتحطله سياسه صرف يمشي عليها وآخر السنه هتحاسبه هو فعلا طبق السياسه دي وصرف صح ولا خرف فيها وضحك علي الناس وبقي ياخد حقوقهم اللي مفروض يقبضهالهم وخد لنفسه كل حاجه وما اداش للناس حقوقها الي تستحقها !؟ ..

فمسئوليه الغني بالمال مسئوليه كبيره .. تحتاج محاسبه النفس كل يوم ومراجعه هو انا ماشي صح ولا لأ ومش معني انك تبقي ظالم وربنا سايبك غني فأنت امين خزينه ناجح بالعكس، ممكن ربنا مديلك فرص تانيه عشان يجربك تاني وتالت بس الفرص دي لو بردو مكنتش امين فيها هتقلب عليك و هتتقل من حسابك في الاخر وقت الجرد و الحساب .

فياريت نلحق احنا نجرد علي نفسينا و نظبط حسابتنا قبل ما نقابل ربنا و نفهم ان الغني في المال مسئوليه لازم تبقي قدها.