عمرو أديب تعليقا على تصريح وزير خارجية إثيوبيا بملء السد: الناس دى قفلت الباب

علق الإعلامي عمرو أديب، على حوار وزير الخارجية الإثيوبي لإحدى الصحف الأمريكية فيما يتعلق بسد النهضة، وقال: "أقل ما يقال عليه إنه حوار سيئ لمسئول إثيوبي، واللى يقرأ الحوار بتاعه يعرف إن دي دولة بتقفل باب المفاوضات تماما ومش سايب مساحة لأي شىء أو مفاوضات، لأنه قال إنه هيتم ملء السد الشهر المقبل سواء وافقت مصر أو لم توافق، وده معناه إن هما قفلوا الباب تماما".

وأضاف عمرو أديب، خلال برنامج "الحكاية" الذي يذاع على قناة mbc مصر: "والمشكلة أن هما اللي بيتهمونا أن مصر اللي بتدور على حرب، وإن هما اللي بيقولوا دلوقتي إنهم اللي صبروا علينا 9 سنوات، الأزمة أن احنا اللي صبرنا عليهم طول المدة دي كلها، والمشكلة أنهم قالوا في الحوار بتاعهم أن لو جه جفاف محدش هياخد مياه مننا وكأن نهر النيل بتاعهم، وهنا المفاوض المصري كان عنده حق، وأننا ماشيين في سكة صح ومش سايبين حاجة للظروف".

وقال عمرو أديب: "وزير الخارجية الإثيوبي قال إن كلام أمريكا عن سد النهضة ميهمنيش ومش هلتفت ليه بس بطريقة غير مباشرة بين السطور كدة، بس على فكرة البنك الدولي قال إنه مش هيمول بناء السد إلا لما يتم الاتفاق مع دول الجوار، وعلى فكرة هو بيتكلم بجد، لأن مستحيل يمولهم بمبالغ كبيرة وبعدها ميقدروش يدفعوا بسبب الخلافات على المياه النيل مع الدول المطلة على النهر".

وأضاف عمرو أديب: "كل كمية مياه عندنا بتأثر على حجم تبوير الأراضي الزراعية، لأننا مش محتاجين كهربا من النيل، لأن عندنا الحمد لله محطات كهربا كبيرة بتغطي احتياجاتنا".