شوبير: ظهور حالات كورونا فى الدورى طبيعى.. ومراتى مدمنة شاى وبعشق ريال مدريد

أكد الإعلامى أحمد شوبير، حارس مرمى الأهلى ومنتخب مصر السابق، أن ظهور حالات إصابة بكورونا فى مسحات أندية الدورى أمر طبيعى للغاية، وقال شوبير فى برنامجه الإذاعى عبر أون سبورت، "ظهور ست حالات إصابة بكورونا بين أندية الدورى شىء طبيعى للغاية، إنجلترا فى أول فحص ظهرت 8 حالات ثم 6 وظهرت حالات والدورى شغال، وإسبانيا أول فحص كانت 5 حالات والناس كملت وعادى جدا، وعجبنى تصريح الدكتور أشرف صبحى وزير الشباب والرياضة لما قال عادى هنكمل والمصاب يتعزل ويرجع يكمل.. ولسه فى ناس بتتكلم عن إلغاء المسابقة عشان خايفة فريقها يهبط وبيقولوا نرجع ليه عشان الأهلى ياخد الدورى ده ظلم.. ظلم إيه يابتوع الهبوط".

وأضاف شوبير، "الناس فى إسبانيا وإنجلترا واليابان أعلنوا عودة الجماهير للملاعب قريباً وليس عودة المسابقات، الدورى شغال وبجمهور فى تنزانيا والصومال والمجر، استنوا وشوفوا شوارع ليفربول بعد تتويج الريدز بالدورى الأسبوع المقبل، زى ما حصل مع نابولى حينما فاز بالكأس وخرجت المدينة بأكملها لولا عودة الدورى فى إنجلترا مكناش شوفنا تألق صلاح وإنجازاته واقترابه من لقب الهداف والتتويج بالدورى لأول مرة منذ 30 عاماً بالنسبة لليفربول".

وتابع حارس الأهلى السابق، "كان المفروض إتحاد الكرة يعلن انهارده جدول مباريات الدورى، ولكن اللجنة الخماسية فضلت الانتظار لحين الانتهاء من مسحات الفرق كلها وحتى يكون الاتحاد الأفريقى قد أعلن جدول مباريات الكونفدرالية ودورى الأبطال الأفريقى، والناس فى اتحاد الكرة بيقولوا مجالناش خطابات انسحاب لو جه هنطبق اللائحة اللى هى قانون ودستور المسابقة عشان مفيش حد فوق القانون".

وأكمل شوبير، "أنا بحب الشاى بلبن الصبح وبعتبر نفسى العاشق الأول لريال مدريد فى مصر، ومراتى مدمنة شاى بالنعناع بتشرب 30 كوب كل يوم بعملها أنا منهم 10 يومياً".

وفى وقت سابق، أكد الإعلامى أحمد شوبير، حارس مرمى منتخب مصر السابق، أن النادى الأهلى بإمكانه التتويج بالدورى بمجهوده ودون مساعدة من أحد، وقال شوبير فى برنامجه الإذاعى عبر أون سبورت، "كل مايتكلموا عن الدورى يقولوا راجع عشان الأهلى، أيه العلاقة بين الأهلى وعودة الدورى، رؤساء الأندية بيقولوا هنغرم ملايين بسبب الأهلى، هو الأهلى ماله ولا ذنبه أن بيدور على الحق ".

وأضاف شوبير، "الدنيا اتشقلب حالها بدل ما نصفق للمجتهد ونقوله برافو بنهاجمه، الأهلى مش عايز حد يديه الدورى، الأهلى بياخد الدورى بمجهوده وبإنجازاته وسواعد لاعبيه، مش محتاج مساعدة من حد، لو فقدتوا الأمل فى التتويج بالدورى فكروا حتى تكسبوا مباراة الأهلى".

وتابع حارس الأهلى السابق، "يابشوات الدورى المغربى راجع، والأندية اللى هتقابلوها فى أفريقيا هترجع وتبقى جاهزة فنياً وبدنياً هتعملوا أيه ساعتها، الكاف قال لازم الفرق الأربعة يعملوا مسحات كورونا ويستعدوا لأنه مش هيلغى أو يأجل بطولاته".

وعن أول مران للأهلى علق شوبير، "أرضية التتش شكلها حلو باين إنها اتجهزت صح فى فترة التوقف، ورمضان صبحى عامل نيولوك كريستيانو رونالدو، وفى تباعد ومسافات صح، فى ناس شغالة وبتفكر".

وأضاف أحمد شوبير، "أكتر حاجة كانت بتوجعنى الفترة اللى فاتت كلمة صلوا فى رحالكم، دلوقتى من حقنا نرجع المساجد، وواحدة واحدة هترجع صلاة الجمعة ولسه فى ناس بتهاجم عودة الحياة".