زوجة مهندس مصرى تطالب بإعادته من السعودية بعد حصوله على البراءة

ناشدت ابتسام سلامة، زوجة المهندس على أبو القاسم - الذى حصل على البراءة بعدما حكمت عليه السلطات السعودية بالإعدام لاتهامه بالاتجار فى المخدرات، وذلك عقب تواصل من المسئوليين المصريين مع نظرائهم فى المملكة حتى أثبتت برائته - وزارة الخارجية، ووزارة الهجرة وشئون المصريين فى الخارج، والسفارة المصرية فى السعودية، بالتدخل مرة أخرى لاستكمال إجراءات إعادة زوجها إلى مصر بعد الحكم ببرائته منذ عدة أشهر.

وقالت زوجة المهندس على أبو القاسم، فى مقطع فيديو انتشر عبر منصات التواصل الاجتماعى، "أنا ابتسام زوجة المهندس على.. الكل عارف قضية جوزى وعارفين إن حصل تطورات فى قضيته وبفضل ربنا وفضلكم ودعمكم زوجى حصل على البراءة من سنتين بعد ما كان السبب فى القبض على أكبر تشكيل عصابى فى مصر,, والحمد لله حصل على البراءة والمتهمين اعترفوا كلهم إنهم ميعرفوش زوجى وإن هراسة الأسفلت اللى بعتوهاله فى السعودية كان ليهم مستلم تانى، لكن زوجى كان هيخلص الإعفاءات الجمركية بس بتاعت هراسة الأسفلت اللى أرسلت من مصر للسعودية".

وأضافت "زوجى اتهم فى السعودية من 4 سنوات من 13 أكتوبر 2016 بجلب حبوب مخدرة من مصر.. والحمد لله قدرنا نحصل على براءة زوجى من سنتين لما قبضوا على التشكيل العصابى.. من وقتها زوجى حصل على البراءة فى مصر والسعودية لكن مخرجش.. المسئولين وعدونى إنه هيرجع مع طائرة العالقين نتيجة الظروف الراهنة بكورونا لكنه مرجعش.. وقالولى هيرجع فى العيد ومرجعش وهيجى علينا العيد الكبير وبردو مش هيبقى معانا".

وتابعت "أنا أولادى بيسألونى دائمًا عن باباهم.. بيقولولى هو مرجعش ليه مش أنتى بتقولى إن هو حصل على البراءة وإن المصريين وقفوا جنبى.. أرجوكم كل واحد يحط نفسه مكانى أنا وأولادى وكل واحد يحط نفسه مكان زوجى البرئ.. أنا جوزى بيتحطم كل يوم نفسيًا ومعنويًا وصحيًا فى السجن.. أرجوكم يا مصريين أنا محتاجة دعم كل واحد فيكم إنه ينشر الفيديو ده.. أنتوا فى الأول وقفتوا جنبى ووصلتوا صرختى للمسئولين.. أرجوكو كملوا معايا للنهاية عشان خاطر أولادى.. أقفوا معايا ومع جوزى عشان يرجع ويعيد مع أولاده هنا فى مصر.. هو حتى لسه مخرجش من السجن فى السعودية".