‎كوكا يهدى والده الراحل بطولة الدورى اليونانى: كان نفسى تبقى معايا

أهدى أحمد حسن كوكا، النجم المصرى المحترف فى صفوف أولمبياكوس اليونانى، المتوج ببطولة الدورى هذا الموسم، نجاحه مع الفريق إلى والده الراحل، مؤكدا أن حلم والده هو أن يفتخر بى أمام أهله وأصدقائه، حيث قال له "عايزك ماترجعش مصر غير وإنت مشرفنى بره عايز أفتخر بيك وسط أهلى".

 

وأضاف كوكا: "كبرت وجالى عرض احتراف وهو على طول فى ضهرى، قال لى قبل ما أسافر كلمتين مش هنساهم لآخر يوم فى حياتى (عايزك ماترجعش مصر غير وانت مشرفنى بره عايز أفتخر بيك وسط أهلى) قلت له إن شاء الله يا بابا، سافرت وفى أول شهر نزلت التمرين ولما رجعت كان فى مطافى وبوليس كتير عند بيتى، فبصيت لاقيت شقتى كلها بتتحرق، كل حاجه كانت عندى فى الشقة راحت، كلمت بابا وقلت له أنا عايز أرجع مش قادر على الغربة واللغة صعبة، وبعد اللى حصل ده يمكن ربنا مش رايد انى أكمل هنا، قال لى أنا بكرة الصبح هجيلك".

وتابع كوكاك: "بابا تانى يوم كان عندى وجايب لى لبس جديد كتير وادانى فلوس عشان أجيب اللى عايزه وقال لى أنا جيت عشان أفكرك أنك مش هترجع غير لما تشرفنى وتشرف بلدك، انت فاكر انها سهلة؟ اللى حصل ده يقويك مش يخليك تستسلم".

واختتم كوكا: "الحمد لله على كل حاجة.. بس انا من غير والدى ماكنتش كملت، الله يرحمك يا أطيب وأحن وأرجل إنسان شوفته فى حياتى، كان نفسى تبقى معايا وتفرح بى، إن شاء الله نتجمع تانى فى الجنة".