محترفة اليد مروة عيد تعلن تعافيها من فيروس كورونا

أعلنت مروة عيد عبد الملك محترفة كرة اليد فى صفوف نادى نيس الفرنسى عن إصابتها بفيروس كورونا وتعافيها منه، وذلك عبر صفحتها الشخصية على "فيس بوك"، بعد اكتشاف الإصابة بالصدفة.

وعلقت مروة عيد على صفحتها كالتالى :

أنا جالى #كورونا

مفيش يا سيدى النهاردة الصبح عملنا المسحة وتحليل الأجسام المضادة قبل بداية الموسم زى كل الناس وفجأة ع الساعة 4 العصر ألو أيوه إنتى التحليل بتاعك طلع "إيجابى" مكدبش عليك الدنيا فجأة بقت لونها أسود في عيونى بس قومت اتوضيت وصليت ركعتين شكر لله معرفش الهدوء ده جالى منين الفكرة كلها كانت إزاى هقول لأمى انا عندى كورونا وأنا ف فرنسا لوحدى دى لوحدها موال ده اللى فارقلى مكدبش عليكم إحساس صعب قوى أنك بتواجه شبح العالم كله يئس منه ومحدش عارف يعالجه وأنا مش بالقوة دى اللى يعرفنى كويس يعرف إنى بخاف ع نفسى قوى، ساعة زمن عدت عليا وكأنها سنين ما بين إزاى هواجه المرض ده لوحدى ف غربة تليفونات كتير قوى يمين وشمال أسبوعين عزل ومتخرجيش انتى فين خلى بالك وفجأة طب استنى نتيجة المسحة كمان ساعة هى اللى هتأكد وفجأة شعاع نور بيقولك لا أستنى كده ده تحليل أجسام مضادة إيجابية والمسحة الحمدلله سلبية يعنى إنتى كان عندك كورونا وخفيتى منها ودى أجسام مضادة كمية عياط رهيبة عياط فرحة عجيبة!!!

افتكرت آخر مداخله ليا كانت مع ك/سيف زاهر وقت الحظر قولتله ساعتها إنى عندى شويه برد أتاريهم مكنوش شوية برد تؤتؤ دى كانت كورونا والحمدلله عديت منها ع خير كانوا أسبوعين صعبين قوى بس عدوا بكرم ربنا بس وفضله، فجأه القلق اتقلب لفرحه وانتصار ولا كأنى أخدت بطولة هى بطولة فعلاً أنك تنتصر على مرض راعب العالم كله وأنت مش عارف ده من رحمة ربنا إنى مكنتش أعرف أنها كورونا مش مش مجرد برد وجالى تؤ دى كورونا من 3 شهور

إحنا حرفياً ملناش يد في أى حاجة بتحصل لنا.

إحنا عايشين بستر ربنا ولطفه وكرمه ربنا كبير قوى، يارب متعيشوش الساعة اللى أنا عشتها دى خوف ورعب من مجهول ومصير محدش عارفة الحمدلله أنا كنت شايله هم أمى بس ربنا يبعد عنها وعنكم كل شر ويشفى كل مريض، الله يخليكم خلى بالكم من نفسكم الخوف من مجهول إحساس يقهر ويوجع حافظوا على بيوتكم وأهاليكم ربنا ينجينا جميعاً الحمدلله عدت على خير ربنا يشفى كل مريض ويحفظنا ويحفظكم، لسه في العمر باقيه دعواتكم.