القارئ د.أحمد أبو القاسم يكتب: إزاى تخطط لمستقبل ابنك الجامعى

واحنا طلبة ناجحين بتفوق في الثانوية العامة وفرحانين اننا دخلنا كليات "القمة" علي حسب ما كان الاعلام بيحب يطلق عليها،

حد من زمايلنا كان ليه حد قريبه راجل برنس في نفسه قاله سيبك منهم وتعالي ادرس تكنولوجيا معلومات IT.

زميلنا ده سمع كلام قريبه وراح يدرس IT.

وقابلنا مرة وقال انه ساب كليات القمة وراح يدرس IT، فاحنا نسكت ؟!

اطلاقا .

هاتك يا تنمر ورخامة عليه وأسئلة سمجة من نوعية (ودي يطلعوا منها ايه ؟، طب احنا دكاترة وغيرنا مهندسين انت بقي اشتغلي ايه؟)

زميلنا كان حد حالم ومركز ودبلوماسي ، كبر مخه مننا ومن أسئلتنا العقيمة زي فكرنا في الوقت ده .

وراح درس واشتغل علي نفسه والنهارده بِسْم الله ماشاء الله عروض التوظيف جوه مصر وبره مصر مش مبطلة، واول تعيين ليه كان براتب يفوق ساعتها دخل عيادة اتخن طبيب في نفس عمره، ده غير انه لما هو اتخرج احنا كنّا _ولازلنا _بندرس !

طبعا الكلام ده من اكتر من 21سنة!

بس ليه بقوله وبكرره علشان لو ولي امر طالب واحد سمع واتغيرت قناعته يبقي الواحد اخد ثواب الطالب ده .

وكمان لان ده جزء من خطة تطوير مصر وربط المناخ التعليمي بسوق العمل .

طيب هل معني اني مش عاوز حد يدخل طب ؟!

اطلاقا .

مصر محتاجة أطباء، ومش ابنك او بنتك اللي حيأثروا علي دخل طبيب زيي او غيري ، لكن دراسة الطب فعلا مرهقة وممتدة long term learning.

وبالتالي لو مكنش الطالب فعلا غاوي العلم وفيه دعم اسري ليه معنوي ومادي صدقني مش حيقدر يكمل، ومحدش حيبقي فرحان بطبيب كاره شغله وكاره دراسته .

ده بالنسبة للطب البشري، تخصصات تانية زي الصيدلة والأسنان والعلاج الطبيعي تقريبا بدا يحصلها تشبع ودوّل الخليج قفلت عليهم من فترة طويلة !

وبلاش ترفع سقف توقعاتك في ابنك او بنتك وتتوهم إنه حيجيب التايهة ويحقق معادلة صعبة الا لو كنت انت مخطط تورثه صيدليتك او مركزك وده برضه مبقاش مضمون في ظل المرحلة الاندماجية القادمة اللي مصر داخله عليها بسبب التأمين الصحي الشامل .

كليات زي التجارة والآداب والحقوق اعتقد الناس عرفت ان المتميز بس اللي بينجح في مستقبله بعد ما يتخرج منها .

طب الحل ايه ؟!

الحل عمره ما كان شهادة بفلوس تتعلق عالحيط.

الجامعات بره مصر بتتصنف علي قوتها في ربط الخريج بسوق العمل !

وهنا مصاريفها بتزيد.

علشان كده لازم تعتمد علي معلومات ثقة، في رسم مستقبل ابنك، اكثر من كلام الناس وجروبات واتس الماميز.

كمان لازم تعرف ان مفيش فرصة سهلة ، كل ما يبقي تنافس ابنك صعب كل ما  يبقي الموضوع مستاهل .

لو ابنك لسه في إعدادي ودخلك متوسط، فيه مدرستين كويسين حاول تخلي ابنك فيهم

١-مدرسة ايجيبت جولد بالعبور لتصنيع المجوهرات.

٢_مدرسةالثانوية النووية بالضبعة.

اما لو في ثانوي ودخلك متوسط:

كلية الذكاء الصناعي بكفر الشيخ.

حاسبات القاهرة شعبة ذكاء صناعي .

دي تخصصات مستقبلها واعد وسوق العمل بتاعها لسه محتاج.

لو خايف علي مستقبلهم، خطط لهم صح .