مباراة القمة فى عش الزوجية شكلها إيه؟ منى: جوزى بيودينى عند ماما ويبات لوحده لو الزمالك خسر.. شيماء: خطيبى مصمم يصورنى بفانلة الأهلي.. سمر: بنتغدى قبل الماتش عشان نفسنا ما تتسدش.. وأميرة: بنتراهن وبيدفع دم قلبه

ساعات قليلة وتبدأ طقوس ما قبل مباراة القمة، حيث يستعد مشجعو قطبى الكرة المصرية كل منهم بطريقته الخاصة لمتابعة مبارة الزمالك والأهلى مساء اليوم، وبغض النظر عما ترصده عدسات الكاميرات مما يحدث على المقاهى بين المشجعين، قررنا معرفة كواليس الاستعداد داخل المنزل التى يشجع فيها الزوجين كل منهما فريق مختلف، وحكت لنا بعض الفتيات طقوس هذا اليوم مع أزواجهن أو شريك حياتهن.

مباراة القمة

منى: جوزى بيودينى أنا والولاد عند ماما

بدأت "منى عبد المنعم" حديثها مع اليوم السابع قائلة: "جوزى زملكاوى مجنون، ويوم الماتش ما بيحبش يشوف حد حواليه عشان بيبقى منفعل، عشان كدا بيودينى أنا والولاد عند ماما، ولو الزمالك خسر بيبات لوحده وما يجيش ياخدنا".

وأضافت منى: "عشان كدا بفضل أدعى طول اليوم إن الزمالك يكسب بالذات فى ماتشات القمة عشان أنا اللى هتنكد فى الآخر لو خسروا".

شيماء: خطيبى مصمم يلبسنى فانلة الأهلى لو كسبوا

أما "شيماء على" فقصتها مختلفة، حيث يشجع خطيبها النادى الأهلى، بينما هى تشجع الزمالك، وهنا كان الخلاف، ولأنه متعصب وهى كذلك فقرر أن يكون التحدى هو أن يجعلها ترتدى تيشيرت النادى الأهلى إذا خسر الزمالك مباراة اليوم، مضيفة: "مش متخيلة نفسى لابسة فانلة الأهلى ومحدش هيتخيل أصلًا لو شافنى بيها".

الأهلى والزمالك

سمر: بنتغدى قبل الماتش عشان نفسنا ما تتسدش

بينما قالت سمر يوسف، إنها وزوجها لديهما طقوس خاصة قبل مباراة القمة، خاصة وأنها متعصبة لنادى الزمالك وهو على النقيض لنادى الأهلى، تبدأ بتشجيع كل منهما للآخر قبل الماتش، ولكن الأمر يختلف كثيرًا بمجرد بدء المباراة.

وتابعت يوسف: "أول ما الماتش يبتدى كل الكلام دا بيتبخر ومش بنتكلم سوا وانفعالات بقى مع كل هجمة، بس أساسى نكون متغديين قبل الماتش علشان لو حد فينا نفسه اتسدت مش هياكل، وأحيانًا بجيب لب علشان أخبى فيه التوتر والقلق، ولو الزمالك كسب جوزى بينزل بعدها مش بيقعد فى البيت لأن أنا بفضل اتابع احتفالات الفريق وبيتغاظ، ولو الأهلى كسب لا قدر الله انا بدخل أنام واسيبه يحتفل براحته".

أميرة: بنتراهن الخسران يعزم التاني

وتتحدث أميرة حسين عن طقوس مباريات القمة بين الأهلى والزمالك قائلة: "بيبقى رهان إن الخسران يعزم التانى على اللى هو عاوزه، وطبعا الأهلى بيكسب وبيكع دم قلبه وهو متغاظ ويقعد يشتم فى الحكام والمدربين واللعيبة، ويروح ينام بدرى ويقفل الفيسبوك عشان ميتحفلش عليه".