صباحك جنينة بحالها يا أفندم

صباحك زي كوباية شاي بلبن...

صباحك زي ساندوتش جبنة مخدوم....

صباحك ركنه سهلة في النادي ...

صباحك اكلة سمك يوم الجمعة....

صباحك ملوخية من البرنس..

بان بوردو من تيدز...

و احلى salted caramel fudge brownies.

صباحك زي ساندوتش شاورما من اي حتة بتحبها...

عسل و طحينة بعد الأكل...

صباحك نفس شيشة خارمانله....

صباحك سيجار بعد يوم شغل طويل...

صباحك حمام محشي بفريك....

وقفه في بنك قدامك واحد بس.

صباحك زي اجازه النهارده من الشغل....

صباحك زي القبض نزل....

صباحك زي اخر قسط في القرض...

الكهربا قاطعه و لسه جايه.

هدوم كانت ضيقة و لبستها من غير معاناة.

صباحك منديل وايبس بعد اكله السمك.

صباحك فنجان قهوة مظبوط على مزاجك بالمسطرة.

صباحك نسمة هوا عالبحر في يوم رطوبة.

صباحك طشة جسمك في الميا بعد قعدة طويلة في الشمس.

صباحك لسعة التكييف في حر اغسطس.

صباحك اغنية عمرو دياب في الصيف.

صباحك اغاني التسعينات تيجي على سهوة في الراديو...

صباحك سكة سفر مليانة مزيكا حلوة..

صباحك زي الطيارة الي وصلت بالركاب ارض المطار بعد سنين غربة....

صباحك زي السرير بعد يوم طويل لف في الشوارع.

صباحك دعوة كان نفسك تتحقق... و تخيل انها النهاردة تحققت.

صباحك تفتكر ذكريات حلوة و تضحك...

صباحك مكالمة فيديو مع شلة صحاب العمر..

صباحك قرار حلو اوي في الشغل. ( منك او ليك).

صباحك كتاب حلو اوي لو بتقرا.

صباحك جملة تشفي قلبك في بوست عالفيسبوك.

صباحك ضحكة ولادك لو عندك اولاد...

و ابتسامة اهلك لو لسة موجودين ( ربنا يخليهملك)...

صباحك حضن و بوسة و امان....

صباحك دلع و حنية و ابتسامة لطافة...

صباحك حلو ...بيك و منك و ليك.

صباح الفل و الورد و الياسمين...

صباحك جنينة بحالها يا افندم.

شكرا

أخر الكلام:

"أعدي لي الأرض كي أستريح فإني أحبك حتى التعب."

محمود درويش.