الفنان أحمد العوضى يكشف تفاصيل زواجه من ياسمين عبد العزيز.. ويؤكد: طلبت الطلاق منى لما شافتنى باكل كبدة نية.. والناس بتطلب تتصور معايا بتكشيرة "عشماوى".. والتمثيل قدام أحمد السقا حلم.. فيديو

حل الفنان أحمد العوضى، ضيفا مع الإعلامية منى الشاذلى من خلال تقديمها لبرنامج "معكم" المذاع على قناة CBC، والذى تحدث عن كواليس شخصية الإرهابى هشام عشماوى في مسلسل "الاختيار" مع النجم أمير كرارة، كما تحدث عن بطولته الأولى من خلال مسلسل "شديد الخطورة" الذى عرض عبر منصة "watch it"، كما أن الحلقة نالت إعجاب الكثير بعد تصريحات أحمد العوضى الجريئة عن زوجته النجمة ياسمين عبد العزيز عن بداية تعارفهما.

وقال الفنان أحمد العوضى: "سعيد جدا بكل ما يحدث في حياتى سواء المهنية أو الشخصية، ومسلسل "الاختيار كان خطوة مهمة في مسيرتى ولم أفكر لحظة في خوض التجربة من عدمها لأن مش من الذكاء أن أفكر في فرصة قوية تجيلى لأن النجاح جزء كبير منه إقتناص الفرص".

وأضاف: "الفرصة لما تجيلى في عمل أجسد فيه هشام عشماوى في مسلسل الأضخم في العالم العربى منذ فترة كبيرة، وبتحمل رسالة توعية للناس بأن الجماعة الإرهابية دول بيفكروا ازاى، مينفعش أتردد أنى أخاف وانا عندى مقولة بتقول "اللى قلبه خفيف رزقه ضعيف" ودى بطبقها في حياتى".

وتابع: "أنا مينفعش أعمل شخصية زى دى وأكون مبتسم لأن هو أصلا شخصية مش بتاع سياسة هو بتاع قتل وتفجير، فكان لازم التكشيرة دى، وبقيت هي فعلا الموضوع كله والناس في الشارع بتتطلب منى تتصور بالتكشيرة دى يقولى عشان أوريها لخطيبتى".

وأشار إلى أنه استيقظ في يوم ووجد أن الرئيس عبد الفتاح السيسى يقول "الله المستعان" الجملة التي قالها أثناء تجسيدى شخصية "عشماوى" في مسلسل "الاختيار"، كما أنه شاهد المسلسل وأثنى على دورى، ده شرف كبير ليا وعلى راسى وأكبر تكريم بالنسبة لى".

وأوضح أن مشاهد مسلسل "الاختيار" كانت صعبة بس مشهد الإعدام كان أصعبها وخاصة التحقيق مع النجم أحمد السقا، وأنا قلت قبل كده كان حلم من أحلامى إنى أمثل قدام السقا"، متابعا: "أنا شخص متوتر دائما، وماشى بمبدأ اللى هاعمله بعد كده، يعنى بعد نجاح مسلسل "الاختيار" وأن الدور كسر الدنيا وفرحت بالدور وبالنجاح ده، أفكر بقى هاعمل ايه عشان استمرارية النجاح". وتابع قائلا: "شركة سينرجى هي من رشحتنى لشخصية "عشماوى".

وكشف العوضى عن بداية علاقته بالنجمة ياسمين عبد العزيز، وقال: "في البداية تم ترشيحى في مسلسل "لآخر نفس" وأنا كان نفسى أشتغل مع النجمة ياسمين عبد العزيز، والشركة لما رشحتنى قالولى أنه دور ظابط وأنت قلت مش هتعمل دور ظابط، ولكن لما عرفت إنه مع ياسمين عبد العزيز قلتلها لا عادى أنا أعمل الدور مفيش مشكلة".

وأضاف: "لما روحت ياسمين شافتنى وحطت ايدها على كتفى بشكل جامد كده وأنا مش شايف مين وهى لابسة نضارة، فكنت مستغرب مين ماسكنى جامد كده، يعنى قفشة في البداية كده نص نص بس بهزار، وتانى يوم بقى روحت البروفة فلقيت المخرج قاعد وفى كرسيين جنبه فاضيين، فقلت لما أقعد على الطرف هاتيجى تقعد في النص مش هاعرف أتكلم عشان هتتكلم مع المخرج برده، فقررت أقعد جنب المخرج وميكونش في كرسى فاضى غير اللى جنبى وحصل فعلا وجت سلمت عليا وقلتلها معلش مش معايا نسخة من السكريبت ممكن أبص معاكى فقالتلى اتفضل عادى، وأتكلمنا بقى وكلمة منى وكلمة منها وضحكت يبقى خلاص قلبها مال، والموضوع جه زى أي علاقة عادى تعارف واعجاب وحب ثم زواج".

وأكد أن "الزواج لم يكن في شهر مايو وقت إعلانهما ولكن من زمان وفى شهر يناير في وقت عيد ميلادها كنا متزوجين بالفعل، ولكننا لم نعلن لأن في البداية أحنا مش ضامنين العلاقة هتكمل ولا لا وكنا بنتخانق ونسيب بعض ونرجع تانى لبعض وهكذا ونخاف نقول على العلاقة وتفضل فتتحسب عليها علاقة وخلاص".

وقال العوضى: "ياسمين عبد العزيز غيورة جدا، وده لمسته منها لما جت مرة عندنا في البيت عند والدى، والأباجورة خبطتها في كتفها وهى قاعدة فبتقولى ايه ده فبقولى دى "دولت" أنا مسميها كده وعزيزة عليا، فراحت مسكاها ورمتها فى الأرض مكسراها".

وعن المواقف التي جمعتهما قال: "مرة كنت قاعد وشافتنى باكل الحمامة بعضمها، وهى حسستنى انى باكل بنى أدم واتخانقت معايا ازاى أكلها بالشكل ده وقالت: أنت يتخاف منك".

 

وتابع قائلا: "بعدها بـ 3 أيام لقيتنى باكل الكبدة نية ودى عادة فيا ومتعود أكلها بدمها، وهى كانت لسه صاحية الساعة 10 الصبح، ولما شافتنى بتقولى ده جيلى ولا ايه فقلتلها لا دى كبدة نية ومتزعقيش، فقالتلى انت بتاكل دم وحاولت اشرحلها وقالت أنت هاتطلقنى لما أنت بتاكل كبدة نية هتعمل فيا ايه؟".

وأرسلت النجمة ياسمين عبد العزيز سؤالا لزوجها الفنان أحمد العوضى عن أكثر شيء يحبها فيها والأشياء التي لا يحبها وما الذى يضايقه منها، وجاوب العوضى قائلا: "أكتر حاجة بحبها فيها أنها حنينة وجدعة وفى ضهرى، ومفيش حاجة مبحبهاش فيها، وأكتر حاجة بتضايقنى منها التطويل في الخناقة بينا أنا بحب الموضوع يخلص في كلمة ونص".

 

وأوضح أن "شديد الخطورة" أكثر مسلسل أصيب خلال تصويره بسبب مشاهد الأكشن وقفزه من أعلى العمارات، وتابع: "وأنا بشكر شركة سينرجى والأستاذ تامر مرسى وأستاذ حسام شوقى لأنهم دعمونى كثيرا الفترة اللى فاتت وأنا بحترمهم جدا وليهم فضل عليا كبير، وسينرجى بجد غيرت كتير في الدراما وبقينا نعمل مسلسلات ننافس بيها بره والدراما المصرية رجعت بقوتها بفضلهم بجد".

وأختتم الحلقة قائلا: "أنا مبسوط أنى كنت موجود معاكم ومع الإعلامية منى الشاذلى لأن وجودى معاها شهادة تقدير على شغل اشتغلته، لأنها أهم مذيعة في الوطن العربى، واللى بيظهر معاها بيكون شخص ناجح".