عمرو أديب يكشف كواليس "خناقة" قيادات الإخوان بسبب المقاول الهارب محمد على

علق الإعلامي عمرو أديب، على محاولات جماعة الإخوان لإثارة الرأى العام وتخريب البلاد، وقال: "واضح أن الجماعة مستكترين أنهم يمشوا ورا الواد اللى اسمه محمد على، وحاصل خناقة جوة الجماعة، والأمر له علاقة بالفلوس، وفى كلام بينهم دلوقتى على الرواتب اللى بياخدها الناس اللى مشغلينهم على مصر، وكان الأمر ده بيحصل من تحت لتحت ومن سكات، لكن إمبارح لاقيت رموز إخوانية كاتبة تويتات مباشرة بتقول أنتوا بتفبركوا فيديوهات ما تيجبوا فيديوهات جديدة، وبيخبطوا فبعض جامد".

وأضاف عمرو أديب خلال برنامج الحكاية الذى يذاع على قناة mbc مصر: "لو حد زعلان أو حد غضبان أو حد عنده مطالب، ماشي أنا ممكن أقتنع، لكن امبارح شوفت حاجة غريبة، هاشتاج طالع تريند اقتحموا مدينة الإنتاج، هو من أمتى تويتر بيسمح بالحاجات دى، وأنا فاكر لما حازم صلاح أبو إسماعيل كان معتصم والناس بتوعوا خارج المدينة، وحازم صلاح كان واقف مستنيني بالسكينة برة، وفيوم اقتحموا المدينة ودوروا علينا ملقوناش".

وقال: "الإخوان بقى عندهم هيستريا الهاشتاج، على فكرة هما غيروا اقتحام مدينة الإنتاج وبقت مدينة الإنتاج بس، قال يعنى بيضحكوا على تويتر، هو تويتر ده مفيهوش حد بيفهم عربى يا جماعة؟ الحمد لله الداخلية بتاعتنا مفيش مشاكل أو حاجة نتوقف عندها، والأمور ماشية بشكل طبيعى، والأمن بيتعامل بشكل جيد جدا بمنتهى الأمانة".

وأوضح: "لبنان انهاردة كانت بتحط وزارة، وخلال لقاء الصحفيين مع رئيس الجمهورية، صحفية بتسألوا أحنا رايحين على فين، الراجل رد بمنتهى السرعة إحنا رايحين على جهنم، إجابة صادمة بتدل على صعوبة الأمر في لبنان، والمحافظة على الدولة أمر ليس يسيرا".