عمرو أديب يعرض تقارير حول فيديوهات الاحتجاجات فى مصر: قديمة والصوت متركب

علق الإعلامى عمرو أديب على تحريض جماعة الإخوان الإرهابية للاحتجاجات، قائلا: "الساعة دلوقتى 10 وكل ما قيل عن جمعة الغضب دى لم يتحقق، وبينما كنا نايمين أمس فى مظاهرات بعدد كبير من ولايات أمريكا بسبب إن قاضى حكم ببراءة ضابط قتل مواطنة أمريكية".

وأضاف عمرو أديب خلال برنامج "الحكاية" الذى يذاع على قناة mbc مصر: "الإخوة اللى بيقولوا الغرب مابيغطيش احتجاجات ليه، أقولك إن الغرب بيغطى لما يكون فى حاجة مهمة وعليها قيمة ينفع يتكتب عنها، ووكالة أنباء فرنسية تحققت من فيديو من الفيديوهات اللى نشرتها قنوات الإخوان، وأثبتت أنه من سنة 2013، وقالت إنه قديم والصوت فيه مركب، ودى فضيحة جديدة ليهم كالعادة، وbbc اللى مش لطيفة معانا كمان نشرت أن كان فى احتجاجات لكن فى القرى والمراكز البعيدة عن المدن الرئيسية".

وقال أديب: "أيمن نور النهاردة قام من النوم وقرر ينشر فيديوهات عن جمعة الغضب اللى أنا مش شايفها، الفيديوهات دى بعضها ضعيف جدا، وبعضها معقول، والفيديوهات اللى بيحطها لا تتعدى الـ 15 ثانية، والفيديوهات مفيهاش أى حاجة، واللى احنا طلبناه من كام يوم أن المحافظين ينزلوا ويشوفوا مشاكل الناس، والناس استجابت ونزلوا وشافوا مشاكل الناس واتكلموا معاهم، وأعضاء مجلس النواب نزلوا واتكلموا مع الناس وقاموا بدورهم الحقيقي".

وأضاف عمرو أديب: "الحكومة أعلنت إنها هتمد فترة التصالح، وهى مش قضية جباية، الدولة عاوزة تحط حد علشان توقف التجاوز فى مخالفات البناء، وفى ناس تبرعت للناس اللى مش قادرة تدفع وفى إعفاءات، وده الكلام المهم، والإخوان مسكوا النقطة دى وقالك خافوا، ولو معملناش يقولك مش حاسين بالناس، لا يا حبيبى إحنا عندنا حكومة خففت بالتدريج الإجراءات على الناس علشان حاسة بيهم".