عمرو أديب يعلق على انخفاض إصابات كورونا فى مصر وعن اللقاح الروسى

علق الإعلامي عمرو أديب، على الأرقام الخاصة بفيروس كورونا في مصر، واستمرار انخفاض أعداد الإصابات، وقال: "أنا مش قادر أفسر الكورونا المصري ده الحقيقة، الدنيا فتحت واللي حصل في المصايف كان كفيل أنه يعمل انفجار في أعداد الإصابات بالفيروس، ليه مش عارف، المصريين وأنا منهم جالهم حالة كدة اللي هو خلاص بقى، العالم كله معندوش الكلام ده، العالم بيستعد بكل الأشكال لأرقام إضافية من الإصابات".

وأضاف عمرو أديب خلال برنامج "الحكاية" الذي يذاع على قناة mbc مصر: "الروس بيتحدث عن لقاح سبوتنيك 5 وإنه خلال الأسبوعين هيبدأوا في إنتاجه، والمجلات الطبية العالمية بعد ما كانت بتشكك في اللقاح ده دلوقتي بتقول ده لقاح قوي وبيعمل مناعة كويسة ممكن تمنع الإصابة، ونفس الكلام أمريكا بتقول أنها بتستعد، لكن منظمة الصحة العالمية بتقولنا مش أقل من نصف العام القادم، لكن أنا بقولكم هانت ومفيش مبرر نبوظ الدنيا في الأخر".

وقال: "لما تيجي تسألني إيه هو اختراع القرن الـ 21، هقولك الكمامة، دي عبارة عن كنز كبير في الفترة اللي احنا فيها دي، واحنا داخلين على الدراسة ولازم نلتزم بالكمامة علشان في دراسات بتقول أنه بدأ ينتشر بين الشباب والأطفال، فلازم ناخد بالنا".