قصر القامة ماكنش عائق.. نوسة بطلة مصر فى رفع الأثقال لأربعة أعوام متتالية.. البطلة: عانيت من سخرية المجتمع عشان قصيرة لكن ما استسلمتش.. والدى دافع النجاح فى حياتى.. ونفسى أكون بطلة العالم فى رفع الأثقال

"القزم بفكره وبعقله مش بطوله وبقصره" حكمة أخرجت "نوسة بطلة مصر فى رفع الأثقال من عالم منغلق معتم إلى عالم واسع كبير، تضيئه الشمس بقوة فتخرج طاقات مدفونة لدى فئة عانت من السخرية والتنمر لعقود طويلة، فكر مجتمع سيطر بقوة على عقول لا ترى الاختلاف ولا تقتنع بالقدرات الذاتية الخاصة، لكن يأتى من يرفض هذا الفكر ويثبت أنه قادر لكن باختلاف.

إيناس الجبالى بطلة مصر في رفع الأثقال

كابتن إيناس الجبالى بطلة مصر فى رفع الأثقال وألعاب القوى لأعوام 2017، 2018، 2019، 2020، وحاليًا تعمل المدير الإدارى لنادى كفر سعد بمحافظة دمياط، واحدة من أبطال مصر لذوى القدرات الخاصة، التقى "اليوم السابع" كابتن "نوسة" كما يلقبها الجميع داخل محافظتها، ليتحدث معها عن بطولاتها.

قالت "نوسة: "عانيت كتيرا من تنمر الناس عليا عشان أنا من الأقزام وما كنتش بقدر أخرج من بيتنا، لحد ما فى يوم وأنا فى المدرسة كنت فى المرحلة الإعدادية المدرسة قالت لى العصاية أطول منك، لما روحت معيطة وزعلانة قلت لبابا، فقالى إنت اللى تخلى الناس تفتخر بيكى أو تسخر منك، الكملة دى فضلت فى دماغى وكانت حافزا كبيرا يدفعنى للأمام حتى أنهيت دراستى تعليم متوسط".

إيناس الجبالى بطلة مصر في رفع الأثقال

بعد جملة والدها التى كانت الدافع الأول لها فى حياتها كان هناك إنسان آخر مثلًا أعلى تقول عنه "نوسة": "لما كنت بشوف كابتن إبراهيم حماتو بطل العالم فى التنس طاولة كنت بقول فى أمل إذا كان هو بيلعب ببقه أما أنا هعمل إيه أكيد هقدر أعمل حاجات كتير وأكون بطلة زيه، لأن أنا زى الناس كلها مش ناقصنى حاجة، فأكيد هقدر وما كنتش بييأس".

إيناس الجبالى بطلة مصر في رفع الأثقال 

تكمل بطلة مصر: "التحقت بنادى كفر سعد وتدرجت فيه حتى وصلت إلى المدير الإدارى، أسست فرق ألعاب قوى ورفع أثقال وكرة قدم لقصار القامة وسباحة، دخلت بالفرق دى مسابقات وحصلنا على بطولات جمهورية، كان شغلى الشاغل هو الاهتمام بالأقزام وبذوى الإعاقة، بحثت على الأطفال والشباب من ذوى الاحتياجات الخاصة والأقزام على مستوى محافظة دمياط اللى ما بيخرجوش من بيوتهم فى مكاتب التأهيل وفى كل مكان، وبدأت أنا وكابتن محمد تومة المدرب بتاعى والمدرب الأول بالنادى فى محاولات إقناعهم وإقناع أهلهم بالخروج ومواجهة المجتمع، وكانت النتيجة مذهلة لأن أغلبية الأهالى وافقت وساعدت أبناءها على إخراج الطاقات إللى جواهم وأصبحوا أحسن لأن الرياضة غيرت شخصيتهم وحياتهم كلها، هما عامل أساسى فى المجتمع ومش عالة عليه".

إيناس الجبالى بطلة مصر في رفع الأثقال

تستطرد "نوسة" حديثها لليوم السابع قائلة "اخترت رفع الأثقال لأنها لعبة تحدى مش أى بنت تقدر ترفع أثقال، وزنى 32 كيلو حاليًا برفع 75 كيلو هدفى أزود 105 كيلو بالتحدى والإرادة ما فيش مستحيل ولا خطورة، أنا بتدرب ساعتين يوميًا طول الأسبوع ما عدا الجمعة، ليا أكل معين بكله عشان أحافظ على وزنى، أنا حصلت على بطولة مصر فى رفع الأثقال من سنة 2017 إلى 2020 حصلت على تكريمات وميدليات ذهبية كبير وبحلم أكون بطلة العالم فى رفع الأثقال".

إيناس الجبالى بطلة مصر في رفع الأثقال

وتابعت نوسة": "ماكنش فى معوقات بتقابلنى، غير سخرية الناس ونظرتهم للأقزام اللى بتكسر فينا كل حاجة جميلة، لكن دلوقتى ممكن نقول اتغيرت شوية بعد خروج نماذج قادرة على التحدى من الأقزام وذوى الإعاقة، ياريت أى أسرة فى مصر عندها طفل أو شاب من ذوى الاحتياجات الخاصة أو الأقزام تخرجه وتخليه يواجه المجتمع ما يحبسوش ولادهم، ويساعدوهم يخرجوا الطاقة ويعيشوا حياتهم، مش ذنبه إن ربنا خلقة قصير أو بإعاقة، هو يقدر يعمل كل حاجة بس شجعوا ولادكم وماتستسلموش نظرات المجتمع".

إيناس الجبالى بطلة مصر في رفع الأثقال

وأكملت نوسة "قصة التحدى التانية فى حياتى هى ارتباطى بإنسان متكامل طويل ومش من الأقزام، بحبه جدًا وهو كل حياتى، حبنى زى ما أنا بيساعدني عشان أحقق حلمي وأكون بطلة العالم، اتحدى رفض عائلته وتمسك بيا وأنا كمان اتحديت رفض عيلتي واتمسكت بيه وعشان كده أنا كمان هشيله في عنيا".

إيناس الجبالى بطلة مصر في رفع الأثقال (4)

إيناس الجبالى بطلة مصر في رفع الأثقال (4)

إيناس الجبالى بطلة مصر في رفع الأثقال (5)

إيناس الجبالى بطلة مصر في رفع الأثقال (6)

إيناس الجبالى بطلة مصر في رفع الأثقال (7)

إيناس الجبالى بطلة مصر في رفع الأثقال (8)

إيناس الجبالى بطلة مصر في رفع الأثقال (9)