القارئ سيد عبد الوهاب يكتب: الوصيّة

الوصيّة

كلمة وقالها أبويا زمان

إيّاك يابني تبقي جبان

إوعي تخاف من كلب بينبح

مهما يكون الكلب جعان

واوعى تحاول إنك تدبح

طِير مِسكين ادّيته أمان

واوعى تحاول أبداً تجرح

أو تتشطّر على غلبان

لازم تتعب علشان تنجح

واوعى تسابق أى أَوَان

اوعى تبيع الكلمة وتكدب

واوعى تنافق يوم سُلطان

ارضى برزقك وبلاش تطمع

أحسن يابني تعيش متهان

وايّاك تنطق كلمة هاتوجع

قلب حنيّن عُمره ماخان

وارسم شمس تنور قلبك

شمس تنوّر خير وإيمان

وارفع إيدك واسأل ربك

واوعى تطاوع أى شيطان

وازرع ضحكة تنور وشّك

واوعى تسلّم لِلأحزان

واللّي هَدَاك وردة جميلة

قُوم وازرع لُه مِيت بُستان

أمّا الدنيا بلاش تِهوَاها

اوعى يشدّك يابنى هوَاها

أحسن يُومها تبات ندمان

اصبر دايماً واوعاك تيأس

وارمي حمُولك ع َالرحمٰن

حِبّ الناس وبلاش تِأذيهُم

وافهم إن الناس ألوان

وازرع خيرك جُوّه قلوبهم

وارويه دايماً بالإحسان

عايزك يابني تِحسّ بغِيرك

واوعي تعاير حد ب خِيرك

عايزك يابني تكون إنسان