عاش يا وحش.. مى وعلى بدلوا "الليفنج روم" بصالة ألعاب رياضية فى عش الزوجية

دائمًا ما تكون فترة تجهيز عش الزوجية حافلة بالمشاحنات بين الزوجين الذين يختلفوا في الأذواق أو يكون لدى كل منهما رؤية مختلفة لما تكون عليه الشقة. وفي السنوات الأخيرة أصبحنا نرى الكثير من المناقشات حول عدم شراء بعض الأثاث الذي أثبتت التجارب أنه غير عملي ومكلف لكنه مرتبط بالعرف وما اعتدنا عليه لسنوات طويلة مثل "النيش".

إلا أن العروسين الشابين مي وعلي اتفقا على أن يخالفا الاتجاه التقليدي عند تحضير البيت، واتفق الاثنان على إلغاء "الليفنج روم" واستبدالها بغرفة ألعاب رياضية داخل المنزل. 

غرفة الألعاب الرياضية

تحدثت مي فتحي، والتى تعمل صيدلانية إكلينيكة، بقسم الأورام بالمستشفى الجامعي بمحافظة الإسكندرية، لـ" اليوم السابع"، عن فكرة تحويل غرفة المعيشة إلى صالة "جيم" داخل منزلها، حيث قالت :" أنا متجوزة تقريباً من سنة، وقررت أنا وعلى جوزى، إننا نعمل أوضة جيم بدل " الليفنج"، عشان معظم الناس بعد الجواز وزنها بيزيد، وكمان مفيش وقت لنزول الجيم أو الجرى على البحر، عشان الشغل ومسئوليات البيت، اللى بتاخد معظم الوقت".

أحد الأجهزة

المشاية

وأضافت :" أنا كنت مواظبة علي الجري على البحر قبل الجواز وجوزي كمان كان بيروح الجيم بانتظام، وكنا دايما بنشجع بعض على الرياضة، عشان كده عملنا أوضة الجيم، وحطينا فيها مشايه للجري وجهاز للتمارين والمساج وحرق الدهون وجهاز وندر كور ودكة حرة وأوزان وبارات عشان زوجي بيتمرن حديد جنب الجري ".

مى وعلى

وعن رأى أصدقائها وأقاربها على الاستغناء عن غرفة المعيشة، قالت مى:" صحابي وقرايبي كانوا في الأول رافضين طبعاً، فكرة أن يكون بيت عروسة مفيهوش  ليفنج، وإننا بكده ضعينا فلوسنا على حاجات تافهة، لكن رأيهم مأثرش فينا، وأصريت أنا وزوجى على قرارنا، لكن برضه كان فيه ناس صحابنا مرحبين أوى بالفكرة ونفسهم ينفذوها لكن خافوا يكسلوا عن التمرينات وتتحول أجهزتهم بعد كده لمناشر غسيل".

جزء من الغرفة

وجود صالة "جيم" صغيرة داخل المنزل، شجع مى وزوجها على الانتظام فى ممارسة التمارين الرياضية، وهذا ما أكدت عليه مى، قائلة :"أنا وزوجى بنتمرن على الأقل 3 مرات في الأسبوع، أنا بجري من 3 لـ 4 كيلو وبلعب بطن وأسكوات وزوجى تقريباً بيتمرن كل يوم، مع حرصنا على الأكل الصحى، عشان نحافظ على لياقتنا البدنية ، فمثلاً منعنا السكر الأبيض والأرز والمكرونة والعيش الأبيض وبقينا بنركز أكتر على الفاكهة والخضار الطازة والبروتين".

صورة أخرى داخل الغرفة

مى وزوجها

وتابعت :" اتعلمت من فيديوهات على "اليوتيوب"، طرق عمل بعض الأكلات الصحية، وإزاى ممكن استبدل الدقيق الأبيض بدقيق الشوفان والسكر الأبيض بالعسل في عمل الكيكة  وهكذا فى كل الوجبات، ومع الوقت الأكل الصحى بقى أسلوب حياتنا، لدرجة إننا مش بنبقى قادرين ناكل أي أكل من المطاعم".