حازم إمام لـ موسيمانى: "الدنيا ماشية معاك بتألف فى تشكيل الأهلى ليه"

انتقد حازم إمام، نجم الزمالك ومنتخب مصر الأسبق، أداء الجنوب أفريقى بيتسو موسيمانى المدير الفنى للأهلى، بسبب مباراة البنك الأهلى، وقال الثعلب الصغير فى برنامجه وان تو عبر إذاعة أون سبورت إف إم، "دايما بشيد بأداء موسيمانى مع الأهلى ولكنه فى مباراة البنك الأهلى قرأ المنافس غلط، ومعرفش ليه بيغير فى التشكيل دون سبب، أتفهم أن تحدث إصابات فيحدث تغيير فى تشكيل الفريق لكن طالما الدنيا ماشية معاك كمل ومتألفش فى التشكيل".

وأضاف حازم إمام، "إزاى تلعب بدون رأس حربة أمام فريق متكتل دفاعياً، كان لازم بواليا أو شريف يشارك أى حد فيهم، لازم رأس حربة يهد فى الدفاع ويتحرك يمين وشمال، لأن فرقة البنك الأهلى واقفة تدافع بس".

وتابع الثعلب الصغير، "وربنا أداك إشارة فى التسخين بإصابة وليد سليمان ليه بقى تكمل وتسيبه فى التشكيل، أنا ضد الناس اللى بتقول وليد سليمان يلعب ربع ساعة بس لأ وليد يقدر يشارك من بداية المباراة بس اصابته كان تعنى خروجه من المباراة للحفاظ عليه خوفاً من تفاقم الاصابة وخسارته مباريات متتالية وهو ماحدث بالفعل خاصة أن مباراة البنك الاهلى مش نهائى كأس العالم لازم يلعبها".

وعن الزمالك قال حازم إمام، "قلت لمحبى الزمالك متخافوش من اللجنة الجديدة، لأن الدولة مش هتسيب الزمالك وقولتلهم اصبروا وفعلا كلامى طلع صح، واللجنة ناجحة وكفاية انها حافظت على اللاعيبة وجددت لأغلبهم، كمان بيان أزمة مصطفى محمد قوى ورائع ومناسب للحدث".

وأضاف حازم إمام، "كنت شايف أن رئيس سانت إيتان لا يقصد المعنى الذى وصل من تصريحاته ولكن الزمالك أجاد التعادل مع الأزمة، يبقى نسيب الناس تشتغل ونصبر عليهم وأنا عارف من جوه النادى أن الناس شغالين بما يرضى الله وفيه مكافآت للمجتهد وعقاب للمقصر وشغالين حباً فى الزمالك وبمنتهى الاخلاص".