نجيب ساويرس لتليفزيون اليوم السابع: مفيش حاجة كان نفسى فيها ومعملتهاش

 كشف نجيب ساويرس عن أول صفقة تجارية في حياته قائلا: "كان عندى واحد صاحبي كنت عملت معاه صفقة تجارية في المدرسة، واشترينا تكييفات وشوفنا واحد عايز يشتريها وجمعنا الاتنين مع بعض وطلعنا بـ3000 جنيه، وكانت ثورة واحنا في المدرسة، وأنا استبشرت بيه وعملت شركة معاه، وكبرت الشركة بعد سنتين ونص وكل واحد فينا عمل ربع مليون جنيه، في الوقت اللى كان الدولار بـ 70 قرشا، مشيرا إلى أن سر نجاحه هو الإيمان بالله والشجاعة.

وأوضح ساويرس فى تصريحات خلال حوار سابق مع تليفزيون اليوم السابع، أنه لا يخاف من أي شيء حتى الموت، مشيرا إلى أن الخوف غير موجود في قاموسة، وتابع قائلا: "لو عايزني أموت الصبح هبقي مبسوط، مفيش حاجة في حياتى كان نفسي أعملها ومعملتهاش غير انى عايز أعمل عمل خير ضخم جدا الناس تفتكرنى بيه".

وأكد نجيب ساويروس، أنه ينام يوميا 5 ساعات ليلا وساعة ونص بعد الظهر وحريص على ذلك، وأنه لو كان معه آخر ألف جنيه في حياته سيعطيها لمحتاج، مشيرا إلى أنه لم يستطع أي شخص لي ذراعه، ويرفض التفاوض لحين تغيير الظروف، لافتا إلى أنه من الممكن أن يخسر كل شيء في حياته ولكن عندما يأتي الليل يكون راضيا من نفسه".

وحول علاقة الصداقة فترة الطفولة، قال ساويرس:"الصداقة بتاعت زمان كانت جامدة أوى مش زى بتاعت دلوقتى، كنا كل يوم مع بعض في المدرسة بنروح ونرجع مشي، ويوم الخميس بننزل نروح وسط البلد سينما ريفولي مشي عشان نوفر الفلوس ونحضر فيلم ونلف في وسط البلد."

وحول علاقات الحب قال: "مكنتش أطول مع أي صديقة أكتر من أسبوعين تلاته"، مشيرا إلى أنه يوجد 4 أو 5 علاقات حب في حياته، وأن مواصفات البنات التي كان يحبها "سهتانة ورومانسية وهادية".