شوبير لـ رمضان صبحى: هتقعد مشدود 5 سنين.. الطموح مش هيتحقق فى أول موسم

طالب الإعلامى أحمد شوبير، رمضان صبحى لاعب بيراميدز بعدم زيادة المسافة بينه وبين زملائه فى الأهلى، وقال شوبير فى برنامجه الإذاعى عبر أون سبورت إف إم :"الأهلى خسر نقطتين أمام بيراميدز، المباراة كانت قريبة للمارد الأحمر لولا الرعونة فى إهدار الفرص السهلة، والأخطاء التحكيمية، وهى ليست مسئولية الفار لكن الفار وضح اللعبة والحكمان طارق مجدى حكم الفيديو وجهاد جريشة حكم الساحة لم يحتسبا شىء".

ويضيف شوبير: "فى ركلة جزاء محمد شريف، جهاد جريشة سأل طارق مجدى قاله كمل مفيهاش حاجة رجل شريف عالية، وفى هدف والتر بواليا جهاد جريشة تعجل بإطلاق الصافرة قبل أن تدخل الكرة المرمى بداعى فاول على والتر بواليا لاحتكاكه مع شريف إكرامى وبالتالى مفيش هدف اتلغى، الصافرة كانت قبل تسجيل الهدف إذن الفار ليس له دخل، حكمى المباراة هما السبب".

ويضيف شوبير: "كنت مبسوط بروح أحمد فتحى وتصرفاته فى مباراة الأهلى وبيراميدز، سلم على اللاعيبة وراح أوضة اللبس بعد المباراة وطبيب الأهلى كشف عليه وشاف إصابته، إنما رمضان صبحى ظهر شادد نفسه بشكل غير عادى، يا ابنى أنت اخترت سكتك مشدود ليه، مش قولت رايح بيراميدز علشان الطموح ومش بهزر بتكلم بجد، جاهد بقى عشان تحقيق طموحك وأنت ماضى 5 سنين هتقضيهم فى شد عصبى كلهم ممكن طموحك ميتحققش أول موسم ولا ثانى موسم، ممكن يكون فى ثالث موسم أو الرابع".

وأردف شوبير: "لو روحت سلمت على زمايلك فى الأهلى كانت الدنيا هتفك يا رمضان وكلكم زمايل وهتتقابلوا فى المنتخب متوسعش المسافة يا حبيبى الدنيا سهلة ، ومحدش يقولى رمضان صغير لأ رمضان كبر بما فيه الكفاية".