حكاية بطل مصرى مع مرض السكر.. الأطباء قالوله أنت مريض ومينفعش تلعب رياضة عنيفة.. حصل على الحزام الأسود فى أشرس نظام قتالى.. محمود: أنا أول مصرى يحصل على لقب "Thor".. والسكر كان منافس ليا وهزمته.. فيديو وصور

فى لحظة واحدة قد تضيع أحلامنا وطموحاتنا التى عشنا سنوات نسعى ونرتب لتحقيقها ولكن الشجاع والبطل فينا هو الذى يقاوم ويحاول ويصمم على تحقيق حلمه مهما كانت الظروف التى تقف أمامه، وهو ما حدث مع البطل المصرى محمود حسن الذى حقق بطولات رياضية مختلفة محلية وعالمية، وأثبت للجميع أن مرض السكر ليس له علاقه بتحقيق بطولاتك الرياضية.

"مرض السكر بالنسبة لى كان منافسا ليا يا إما هكسبه وأعيش وأحقق أحلامى يا إما هيكسبنى وأموت"، بهذه الكلمات بدأ محمود حديثه لـ "اليوم السابع"، وقال "الحمد لله قدرت أتفوق على مرض السكر بالرياضة، وحققت بطولات مختلفة، آخرها بطولة ألعاب قوى مسافة 82 كيلو فى منظمة أمريكية، وأنا أول مصرى يحقق فيها لقب Thor ".

وعن بداية حكاية محمود قال "وأنا صغير كنت بحب الرياضة وهى كل حياتى، وكان حلم من أحلامى إنى أحقق بطولات عالمية وأسافر للخارج، لكن مرة واحدة كل حاجة اتغيرت لما اكتشفت إصابتى بمرض السكر، كانت حالة غريبة لأن مفيش أى تاريخ عائلى على وجود مرضى السكر، بدأت أخس بشكل ملحوظ وضعف فى الرؤية وعدم اتزان ولما كشفت عرفت إنى مصاب بالسكر وكان عمرى 16 سنة".

وتابع "أول ما عرفت إنى مصاب بمرض السكر اتدمرت نفسيا، وبدأت أروح لدكاترة عشان أتابع وأعيش حياتى بطريقة صحية وأقدر أتمرن تانى، لكن الدكاترة قالولى بلاش تلعب رياضة عنيفة وتبذل مجهود بدنى، العب رياضة خفيفة وبلاش تضغط على نفسك، بس أنا ملقتش شخصيتى فى ده ولا هقدر أعيش كدا، وساعتها قررت وبلغت أهلى إن البنى أدم بيعيش مرة واحدة، يا إما نعيشها صح ونجتهد وننجح يا إما هنفضل طول عمرنا جمب الحيط ومش هنحقق أى نجاح".

واستطرد حديثه قائلا "ومن هنا بدأت أقرأ أكتر عن مرض السكر وإيه النظام الغذائى اللى المفروض أمشى عليه وأتابعه مع ممارسة الرياضة، والحمد لله بدأت ألعب أول بطولة فى الأكاديمية البحرية للياقة البدنية وأخدت فيها مركز أول وبعدين جاتلى فرصة تبع منظمة عالمية اسمها Musclemania  الأمريكية وهى واحدة من أكبر اتحادات كمال الأجسام واللياقة البدنية في العالم.

وتابع "حبيت أجرب الألعاب القتالية بس كان كل اللى بيتقالى مينفعش لأنك مريض سكر وغلط عليك الجروح والمجهود البدنى اللى هتتعرضله، لكنى صممت وعملت اختبارات والمدرب بتاعى اكتشف انى بستجيب وبتعلم بسرعة والحمد لله فيه منظمة عالمية كلمتنى عشان أشارك فى بطولة العالم للفنون القتالية، والحمد لله حصلت علي الشهادة العالمية والحزام الأسود لأشرس نظام قتالي في العالم".

وعن سبب حبه للرياضة وخصوصا بعد إصابته بمرض السكر قال "سبب إنى لعبت رياضات مختلفة هو أن أثبت لنفسى وللناس أن مرض السكر ميوقفش حد عند حته معينة وبس كدا، لا أنت فى أى رياضة تقدر تلعب وتحط جسمك تحت أى ضغط عالى، مش زى الناس اللى بيقولوا مينفعش تضغط نفسك بدنيا لأن ده خطر عليك، أنا دخلت فى كل ده، مع العلم انى عمرى ما أعلنت إنى مصاب بالسكر ودى أول مرة بقولها بعد ما حققت بطولات عالية ومتفوق عليه ."

وأنهى حديثه.. "أنا رضيت بالموضوع واللى ربنا كاتبهولى وإن دى بدل ما تبقى محنة تبقى منحة ليا، وإن شاء الله أحقق بطولات تانية وأرفع اسم مصر فى كل دول العالم".