اللى مكلش من عند "أم كوريا" مدقش طعم الدنيا.. أحلى سندويتش طعمية فى شبرا

وقفت هى وبناتها الأربعة على عربة طعمية فى شبرا بعد وفاة زوجها، وقررت السير فى طريق الكفاح، لا تكل ولا تمل، فقد وقفت بجوار زوجها أثناء حياته، وأكملت مسيرته بعد وفاته، لم يرزقها الله عز وجل بخلفة البنين ولكنه عوضها بـ 4 بنات هن السند والأمل لها فى حياتها .

وتقول "أم أحلام" أو كما هو معروف اسمها "أم كوريا"، "أنا وقفت على العربية ديه من ساعة ما جوزى تعب ومبقاش قادر يشتغل علشان اصرف على بناتى وعلى جوزى فى تعبه، لأنه كان سند ليا فى الدنيا ومحرمنيش من حاجة، ولما توفى بناتى بقوا فى رقبتى انا وقررت اشتغل واسند البيت".

وتابعت، "احنا بنحلم واحنا صاحيين بس وعمرى ما حلمت وأنا نايمة، لأن اللى زينا لما بيصدق يدوق طعم النوم، اشتغلت فى كل حاجة بعت درة وتين شوكى وجزم ومفرشات واشتغلت فى كل حاجة وفى اى حاجة حلال، وربنا كارمنى لحد اما وصلت لعربية الطعمية ديه".

واردفت: "بقالى 17 سنة واقفة على عربية الطعمية وجهزت منها بناتى كلهم، وجهزتهم أحلى جهاز من الطعمية، كل الناس بتحب الطعمية من إيدى وأهل المنطقة كلهم بياكلوا من عندى الغنى والفقير، لأن رغيف الطعمية ده أساس الفطار والأحلى لما تكون الطعمية سخنة ومقرمشة وعليها شوية دقة وخضار طازة".

واستكملت: "ربنا كريم وبيرزقنى لله الحمد، واللى معاه واللى معهوش بيجى ياكل من عندى، كلها بتاعت ربنا عز وجل، أنا ببدأ شغلى من الساعة 4 الفجر على ما أحضر الحاجة بتاعتى وبنزل انا وبناتى بعد ما نصلى الفجر وبقول يا فتاح يا عليم يا رزاق يا كريم والدنيا بعدها بتتفتح فى وشى".