"علا" الصبح مهندسة معمارية وبالليل فنانة ترسم لوحات بالخيوط والمسامير

علا والمسامير

إيمان حكيم

الإثنين، 18 أكتوبر 2021 10:00 ص

بالخيوط الملونة والخشب والمسامير استطاعت المهندسة المعمارية علا محمد الفتاة الثلاثينية اللعب إبداع لوحات فنية رائعة تحمل رسومات حصلت على إعجاب الكثيرين.

قالت علا محمد في حديثها لـ اليوم السابع: "أنا من صغري وأنا بحب الرسم جدا وبحب شغل الهاندميد، يمكن بدأت أرسم من وأنا عندي 4 سنين ومن حبي في الرسم كنت عايزه أدخل كلية فنون جميلة أو فنون تطبيقية وبالفعل امتحنت امتحان القدرات للكليتين ونجحت فيهم بس مجموعي جاب هندسة فدخلت كلية الهندسة حاولت أقرب من الرسم أكتر فدخلت قسم الهندسة المعمارية".

صور لوحات بالمسامير

وتابعت: "بعد التخرج اشتغلت في مجالي في مكتب هندسي ومازالت شغالة فيه حتى الآن لكن مش قادرة أنسى كنت دائمًا أحب الرسم بالحاجات المختلفة. وتقول الفكرة جاتلي كنت في مرة بتصفح الانترنت ببحث عن مرجع فظهرت صورة مرسومة بالمسامير حتى ملامح الوجه والتفاصيل وقتها الموضوع جذب انتباهي جدًا وبدأت ارسم بالزراير وجبت الأدوات وجربت مع نفسي، لقيت نفسي فيه والنتيجة عجبتني جدًا وعجبت أهلي وأصحابي، وهما اللي شجعوني إني أعمل لوحات وأبيعها ويبقى ليا مشروعي الخاص.

صور بالمسامير

وأضافت: في الأول كنت واخدة الموضوع هواية وحاجة بعملها في وقت فراغي، لحد ما فعلا عملت صفحة على مواقع تواصل الاجتماعي فيس بوك وحاولت أفتح مجال رزق لنفسي وأشتغل واعرض اللوحات أونلاين كان في كتير بيتم بيعه وفي ناس كتير بتطلب مني أشكال وانا اصممها وحالاً شغلي بتطلب بشكل كويس كل هذا بجانب شغلي الأساس.

وأوضحت: أنا برسم في البيت، عامله أوضة خاصة بالموضوع ده بس، والأدوات اللي بحتاجها: خشب، مسامير، خيوط، دهان، شاكوش، بعاني شوية عشان أجيب خامات كويسة عشان مش كل حاجة متوفرة وساعات بسافر القاهرة أجيب الخامات اللي مش موجودة عندي بطبع التصميم اللي عايزه أنفذه على ورقة وبلزقها على الخشبة، وبدق المسامير على حدود الرسمة وبعد ما بخلص دق بشيل الورقة وببدأ مرحلة الخيط وتستغرق اللوحات وقت من أسبوع لـ 10 أيام الموضوع مش سهل ولا بسيط بيحتاج وقت ومجهود، في لوحات أخدت مني 30 ساعة شغل.

صور الأحبة

لوحات بالخيوط والمسامير الملونة

عن مصدر الدعم بحياتها تقول: "أهلي هما مصدر الدعم الأساسي ومن غيرهم ماكنتش وصلت للي أنا فيه، ومش هنكر دور مديري في الشغل وأصدقائي، بس في نفس الوقت كان في ناس بيقولوا ليا ده مشروع أي كلام وممكن أي حد يعمله بنفسه ايه اللي هيخلي حد يدفع فلوس في حاجة معمولة بمسامير وخيوط كل الكلمات كنت قاصده اضرب بيها عرض الحائط لأن مفيش حاجة أسمها شغل حلو وشغل وحش الشغل كله حلو الوحش عدمه".

علا والمسامير

صور بالخيوط والمسامير

عن الصعوبات قالت علا: "كنت بعاني عشان أعرف معلومة أو طريقة للرسم بالمسامير والخيوط، ومعظم اللي اتعلمته كان من التجربة، من سنة بالظبط عملت أول ورشة لتعليم أساسيات عشان أسهل على الناس و محدش يتعب زيي، ومن حوالي 3 شهور الحمدلله بحاول مقلدش حد، بحاول يبقى ليا بصمتي الخاصة".

وتنهي حديثها: لسه بدور على نفسي وبستكشفها وبتعلم حاجات جديدة كل يوم لحد ما أتمنى إني أبقى الشخص اللي أفتخر معروفة ونفسي شغلي يوصل لكل العالم، في ناس كتير برا مصر نفسها تشتري لوحاتي بس أنا بواجه صعوبة في موضوع الشحن والشحن هيكلف 4 أضعاف سعر اللوحة بسعى أن يكون عندي برند خاص بيا .