أحمد الشامي: أول مرة انضرب بالقلم فى "بيت عز" وطلعت دمعت برة لإنه شىء مهين

فريق واما

كتب بهاء نبيل

الجمعة، 29 أكتوبر 2021 10:50 م

حل أعضاء فريق واما، ضيوفا في الجزء الثانى من برنامج "معكم" الذى تقدمه الإعلامية منى الشاذلى، المذاع على قناة Cbc، وتحدث أحمد الشامى عن دوره في حكاية "بيت عز" بمسلسل "إلا أنا"، قائلا: "كنت متردد جدا في الدور، لإنه دور متحرش ونصاب ومزور، ولما اتكلمت مع مراتى قلتلها أنا مش عاوز أعمل الدور ده".

وتابع الشامى: "كنت بفكر أعمل ولا معملهوش وكلمنى أمين جمال وقالى روح امضى بكرة أنا عارف إن الموضوع شائك بالنسبة لك، وفعلا روحت مضيت وعملت الدور، وقلنا بقى كل ما اتشتم أكتر كل ما أنا كدة نجحت أكتر".

وأضاف الشامى: "في مشهد ضربى بالقلم، كان رشدى الشامى متوتر ومكنش عاوز يضربنى، وأنا سخنته قلتله أنا راجل متحرش واتحرشت ببنتك وضربنى، ودى أول مرة في حياتى انضرب بالقلم، وطلعت برة بعد كدة دمعت لإنه شيء مهين جدا ولكن من أجل أكل العيش".

وروى أحمد فهمى موقفا جمعه بأصدقائه في فريق واما في السابق قائلا: "زمان في بدايتنا في وقت من الأوقات كان عندنا حفل في الأردن وكل واحد قابض مثلا ألف دولار مقفول مفيش كسور، وكنا متجمعين فى غرفة نادر حمدى وكلنا جعانين بس مش عاوزين نجرح الفلوس".

وأضاف فهمى: "نادر حمدى طلب أكل وكان في مكرونة بولنيز بس هو مش بيحب ياكل العيش، فقلناله احنا هناخد العيش انت كده كده مش بتاكله ووزعنا العيش على نفسنا ووروحت مقطع لقمة واحدفها في طبق المكرونة عشان تتبل بالصلصة وأكلها".

فريق واما فى ضيافة منى الشاذلى

وطرح فريق "واما"، أحدث أعماله الغنائية بعنوان "نجمة معدية" على موقع الفيديوهات "يوتيوب"، والتي حققت نجاحا كبيرا من حيث عدد المشاهدات، والأغنية من كلمات وألحان عزيز الشافعى فى التعاون الأول بينهم، ومن توزيع توما.

وكان فريق "واما" طرح آخر ألبوماته عام 2019، بعنوان "الصيف ابتدى" والذى ضم 10 أغنيات، تم التعاون فيها مع الشعراء: أيمن بهجت قمر، وأمير طعيمة، ونادر عبد الله، ومحمد عاطف، وجمال الخولي، وأحمد المالكي، وتامر حسين، وهاني رجب، والألحان: خالد عز، ورامى جمال، وتامر عاشور، أحمد صلاح حسني، ومديح، وأحمد فهمي، ومحمد نور أعضاء الفريق، أما التوزيع الموسيقي فشارك فيه كل من نادر حمدي، وتوما، وإيهاب فاروق، ورامي سمير، وأمين نبيل.