إلهام شاهين لتليفزيون اليوم السابع: بفكر في التبرع بأعضائي من زمان لأنها صدقة جارية.. بناشد الناس تعمل زيي ومش فاضية للسوشيال.. وأطالب بخانة في رخصة القيادة والبطاقة تميز بالمتبرع

قالت الفنانة إلهام شاهين، إن الدكتور خالد منتصر هو من بدأ مبادرة التبرع بالأعضاء مضيفة: لما قريت اللي كاتبه عن الموضوع اتبسطت جدا وحسيت إن الموضوع إنساني ومهم وياريت كلنا نقدر نشارك فيه، متابعة: قولتله أنا أول واحدة هعمل فيديو وهناشد الناس علي التبرع بأعضائها.

وأضافت في تصريحات خاصة لتليفزيون اليوم السابع في تغطية أعدها محمد محسوب، وقدمتها آلاء شتا، أتمني إن كتير من الناس يعملوا زيي وأنا سمعت كلام كتير من مؤيدين لكلامي وتبرعي بأعضائي زي الشيخ خالد الجندي اللي قال إنه معلن بتبرع بأعضاءه بعد الوفاة .

وتابعت العديد من المثقفين والعلماء انضموا للمبادرة والتي تحث علي التبرع بأعضائهم بعد وفاتهم ، مضيفة: دا أكد لي إننا بنتكلم في أمور صح ولازم ناخد رأي العلم والدين في مثل هذه الأمور.

قالت الفنانة إلهام شاهين، إنها أوصت التبرع بأعضائها منذ حوالي 15 عام مضيفة: ماما وقتها قالتلي "إيه الكلام الفارغ اللي بتقوليه دا وموت إيه اللي تتكلمي فيه"، مضيفة أنا وصيتهم بدا من زمان لكن العيلة مكنتش موافقة علي رأيي.

وأضافت أنا فكرت في الموضوع بشكل مطلق لأنه خير ولما بسمع إن فيه حد محتاج لكلي لأن حياته هتكون في خطر أو قلبه في خطر أو محتاج قرنية أو غيره بزعل جدا وعلشان كدا قررت إني أتبرع.

 

وتابعت : الموضوع شاغلني من زمان وحاسة إنه هيكون صدقة جارية وهشيل هم عن الناس وهخليهم يعيشوا حياة كريمة ويبعدوا عن البهدلة في المستشفيات والتكلفة الكبيرة.

وقالت التبرع بالأعضاء رسالة كبيرة لم تأت فرصة من قبل لأعلنها أو أطالب بها.

وعن ردود الأفعال حول المبادرة قالت: مليش في السوشيال ميديا أنا مبتابعش خالص معنديش الوقت والصبر علي هذه الأمور، وأنا مش بحب أرد وأجادل وأنا بطبيعتي مجادلة ومبجبش أدخل في الجدال دا وبمشي في طريقي ومبفكرش في رد الفعل هيكون إيه لأن عندي قناعاتي .

في السياق ذاته قالت: أنا بطالب يكون فيه ورقة عمل يكون في الأوراق الثبوتية ويذكر في رخصة القيادة أو بطاقة الرقم القومي .