واخد النحت وراثة.. محمد بيعمل تماثيل فرعونية وبيشارك بيها فى مسلسلات

تماثيل نحت محمد أحمد

كتبت نورا طارق

الخميس، 18 نوفمبر 2021 06:00 م

عشق التفاصيل الفرعونية وألوانها منذ نعومة أظافره فكانت أسعد لحظات حياته هى جلوسه بجوار والده وهو ينحت نماذج مقلدة لتماثيل فرعونية شهيرة، فتعلق قلبه بها، وأصبحت مصدر رزقه بجانب أنها هوايته الفنية فى الأساس، فبات محمد أحمد، النحات الشاب يصمم تماثيل فرعونية تشبه التماثيل الموجودة فى المعابد الفرعونية، وسافرت أعماله إلى الخارج ضمن هدايا تذكارية اشتراها أحد السائحين ليهديها لأصدقائه.

تحدث النحات الشاب، محمد أحمد الحاصل على دبلوم من الثانوية الفنية عن موهبته فى نحت التماثيل الفرعونية، لـ"اليوم السابع"، حيث قال: "اتعلمت نحت التماثيل الفرعونية المقلدة من والدى، لأنى كنت بشوفه وهو بينحت واشتغلت معاه، وحبيت نحت التماثيل الفرعونية لأنها مليانة بالتفاصيل الفنية الجميلة، وكمان لأنه مجال مميز ومش أى حد يقدر يشتغل فى نحتها، عشان مفيش ناس كتير شغالة فى المجال ده، وقليل أوى المحترفين فيه، عشان كده قدرت أثبت نفسى فى المجال ده".

نحت محمد العديد من التماثيل لشخصيات فرعونية، معروفة حيث قال: "نحت تماثيل لشخصيات كتير فرعونية منها الملك توت عنخ أمون، وأمنحتب الثالث ومومياء آمن رع، وأسر فرعونية مختلفة، وغيرها من الشخصيات الفرعونية المشهورة، واللى بقدر من خلالها أبرز موهبتى الفنية فى النحت".

وتابع "مفيش صعوبات بتقابلنى فى نحت التماثيل الفرعونية، لكن المشكلة الوحيدة اللى بتقابلنى فى الشغل هى أن أسعار الخامات اللى بحتاجها فى النحت غالية شوية".

وانتشرت تماثيل محمد فى بعض المسلسلات، وسافرت لبعض الدول الأوربية كهدايا تذكارية أو ديكور، حيث قال: "الحمد لله بيطلب منى شغل فى بلاد برة زى فرنسا وألمانيا، وشاركت فى ديكورات مسلسلات زى مسلسل نسر الصعيد وجبل الحلال وبرامج فنية وصممت هدايا تذكارية".

وعن تعليقات الناس على أعمال محمد الفنية، قال "الحمد لله الناس حابة شغلى وبفرح أوى بتعليقاتهم وبتشجعنى على إنى استمر فى شغلى، والحمد لله مفيش منافس ليا لحد دلوقتى مش غرور لكن ثقة بشغلى".

يحلم محمد بتحقيق المزيد من الأمنيات على أرض الواقع والتى تحدث عنها قائلاً "نفسى يكون ليا مكان كبير أعرض فيه شغلى، وأصمم نماذج مصغرة للمقابر والمعابد الفرعونية وشغلى يتنشر فى كل مكان وأبقى مشهور".