صنع بحب.."نهال" تصمم بوكسات الشتاء الرومانسية هاند ميد من الشموع للجوانتى

ويحتوى "بوكس الشتاء" على جميع المستلزمات التى يحتاجها أى شخص ليشعر بالدفء فى الليالى الباردة، ومن هنا جاءت الفكرة لنهال نبيل التى صممت بوكس الشتاء وإضافته إليه لمساتها الخاصة حيث صممت كل شىء بيديها بداية من القفازات الكروشيه حتى المج المزين برسومات الصلصال الحرارى.

وتحدثت  نهال نبيل، خريجة طب الأسنان جامعة المنصورة، عن هواياتها الفنية وتصميم لـ"بوكس الشتاء"، خلال حديثها لـ" اليوم السابع"، حيث قالت: "أنا بحب شغل الهاندميد من زمان جداً من و أنا فى إبتدائي وتعتبر موهبتى اللى ورثتها من والدى وطورت نفسى من خلال مشاهدتى لفيديوهات اليوتيوب اللى بتعلم شغل الهاند ميد و لما دخلت الكليه كنت بدأت أرسم بورتريهات لصحابي و كلهم شجعوني أعمل صفحه على الفيس بوك أعرض فيها شغلي،  بس خدت الخطوة دي متأخر بعد تخرجى من الجامعة بـ 4 سنين تقريباً".

تابعت :"فكرت أعمل بوكس يكون محتوياته كلها هاند ميد بحيث يكون مختلف عن اللي موجود فى السوق و يكون معمول بحب فعلا، و اللي ساعدني فى كدا إني الحمدلله بعرف أعمل كذا حاجه هاند ميد فصممت محتوياته كلها بنفسي، بداية من جوانتي تريكو هاند ميد مطرز ومج من الصلصال الحراري ومعلقه خاصه بالمج عليها شكل بالصلصال الحراري، وسلسلة من الصلصال الحراري،  وشمعة معطره هاندميد، وطوق فرو و شيكولاته مستوردة وأكتر حاجه شدت الناس فى البوكس هو الجوانتي التريكو و أكتر لون بيتطلب هو الأوف وايت".

وعن زبائن بوكس الشتاء، قالت نهال :"البوكس ينفع هدية من واحد لخطيبته أو مراته أو أخته و بين الصحاب أو للأمهات، وأكتر زبائنه بيكونوا من المخطوبين".

تواجه نهال بعض الصعوبات فى عملها والتى تحدثت عنها قائلة:" الصعوبات هي إن شغل الهاندميد متعب و بياخد وقت و للأسف الناس مش بتقدر ده فممكن حد مثلاً يطلب أوردر و يكون عاوزه تاني يوم و لو اعتذرت بيزعلوا، ياريت الناس تعرف أن الهاندميد بيحتاج وقت و يطلبوا الهديه قبلها بوقت كافي".

سلسلة

صندوق الشتاء

صندوق أخر

شمعة

صندوق شتاء

صندوق شتاء أخر

طوق

قفازات

مج