إبراهيم فايق فى أجرأ حوار مع اليوم السابع: مش بأخذ رأى حد فى شغلى وأخدتها من أول السلم.. بحب تعليق مدحت شلبى.. ولو حاورت محمد صلاح هسأله سؤال واحد: أنت إزاى كده؟.. واهتم فى المقام الأول برأى الجمهور.. فيديو

أجرى تلفزيون اليوم السابع، لقاءا خاصا مع الإعلامي إبراهيم فايق حول مسيرته وعمله فى مجال الإعلام الرياضى، وتطرق اللقاء الذى أعده وقدمه رامى الحلوانى إلى عدد من الموضوعات، بينها المدرسة التى ينتمى إليها فايق فى عمله الإعلامى، وأبرز المعلقين الرياضيين المفضلين، كما تطرق اللقاء إلى الحديث عن النجم الدولى محمد صلاح ورحلة كفاحه وعلاقة فايق بصلاح.

وقال الإعلامى إبراهيم فايق، خلال اللقاء عن بداياته فى المجال: "مفيش حاجة فى شغلانة الإعلام الرياضي مشتغلتهاش، من أول صحفى بالقطعة لحد النهاردة، اشتغلت مراسل، ومراسل لبرامج توك شو سياسية كمان، وفويس أوفر، واشتغلت مونتاج، وقدمت فقرات، وجزء من برنامج، وبعدين بقى عندى برنامج، يعنى أنا خدتها من تحت من أول السلم".

وعن المدرسة الإعلامية التى ينتمى إليها، وما إذا كان يرجع لشخص بعينه فى عمله قال: أنا انتمى لمدرسة المشاهد، مدرسة الجيل الحالى، الاهتمام بالخبر والمعلومة والحوار والتحليل الفنى".

وعن تعاملاته مع الكباتن الكبار ومنهم الإعلامى مدحت شلبى قال: " علاقة يسودها حب وتقدير ومودة ، لكن أنا مش برجع لحد لا فى رؤيتى الإعلامية ولا أى حاجة ليها علاقة بشغلى، كل واحد له منهجية معينة وطريقته المعينة وجمهوره المستهدف".

وحول بعض الممارسات الإعلامية قال: " فيه حالات تحول فى الإعلام بتحصل ، وكان تحت بند السخونة تنتهك حاجات كتيرة وميثاق الشرف الإعلامى ، لكن مؤخرا الموضوع كله رجع لنقابة الإعلاميين والهيئة الوطنية للإعلام، وضبط الإعلام الرياضى له علاقة بالضمير المهنى والهيئة الوطنية للاعلام والمشاهد ، احنا خدامين عند المشاهد ، وعليه لما يلاقى خدمة مش حلوة يعتزلها"

وعن المعلقين المفضلين قال" أحب اسمع مدحت شلبى، أحب تعليقه على المباريات، أما حمادة إمام، وميمى الشربينى ، و محمود بكر، دول ناس اتشكل وجداننا معاهم"،

وأكد الإعلامى إبراهيم فايق، على انه يهتم فى المقام الأول برأى الجمهور، وضرورة أن يمثل رأى الناس ، وعن وجود ضيف معين يحب يحاوره قال: "مقدرش أقول ضيف بعينه انى بحب أحاوره ، كل حلقة ليها طبيعتها ، لكن ببقى متحمس جدا لما الموضوع نفسه يكون سخن".

وعن التحضير والمذاكرة لها قال فايق"مفيش حلقة من يوم ما اشتغلت ماذكرتهاش ودايما اقول لزمايلى فى الإعداد اننا مانقفش على النجاح بتاع النهاردة ، اقولهم مبروك على حلقة ناجحة وحلوة ، لكن اقولهم برضه ده كان امبارح نشوف بكرة وبعده هنعمل ايه".

أما بالنسبة للحلقات اللى "علمت مع الناس" قال "من الحلقات اللى علمت مع الناس كانت حلقة عن المنتخب الوطنى بقيادة حسام البدرى، الناس دائما بتكلمنى على الانترو، وبيفتكروا أنها ارتجالية، لكن أنا ببقى مذاكر الكلام، وبحمل نفسى مسئولية أنى أقول الكلام اللى الناس عايزة تقوله، المنتخب وحش، بالتالى لازم أعبر عن الناس وأمثل أرائهم".

كما تحدث فايق عن محمد صلاح ومسيرته وقال: صلاح حقق اللى كتيرمعرفش يوصل له ونفسى أسأله : انت إزاى كده؟ ووصلت لكل ده إزاى؟"

وتابع "أنا لو عندى مساحة أحاور محمد صلاح هسأله سؤال واحد بس، هسأله أنت إزاى كده ووصلت هنا إزاى؟.

وقال فايق: "مش هسأله عن ماتش كورة ولا جول جابه، هقوله أنت كده إزاى؟، محمد ابن مصر، وده مختلف عن أى لاعيب تانى جه فى تاريخ مصر، واحد أكل أكلك ونام نومتك وأتمرمط زيك، لازم نفهم إزاى وصل لكده، محمد صلاح كان بيقول إنه بيطلع يجيب كشرى، وبالباقى شطة عشان يشبع، عايز أفهم إزاى عمل كده؟.

وأضاف : مر على مصر لاعيبة كبار وأتقل، لكن الفكرة دائما فى الدماغ ، وأنا واثق أن محمد صلاح مش هيبطل كرة قبل 37 و38 سنة، لان دماغه مميزة، أنا قابلته قبل كده، هو إنسان محترم جدا، وخلوق، ومهذب، وعلاقتى به طيبة، لما جالى جلطة فى الشريان الرئوى، اتصل بي، وسال علي، وقالى أنا بقالى 4 أيام بحاول أوصلك ، أنا كنت هجيلك".