جومانا مراد عن مسلسل "زي القمر": الورق كان حلو.. وبيناقش قضية موجودة فى مجتمعنا

جومانا مراد

ماجد تمراز

الأربعاء، 24 نوفمبر 2021 01:26 ص

قالت الفنانة جومانا مراد، إنها أعجبت الورق الخاص بمسلسل "زي القمر" وحدوتة "مش هنفرح بيكى"، حيث ناقش قضية هامة للغاية ومنتشرة في مجتمعنا، حيث يروي قصة فتاة لا يعيبها شيء ولكنها لم تتزوج، هى تعمل طبيبة وتتمتع بأخلاق عالية وجمال كبير، ولكنها وصلت حتى سن الأربعين ولم تجد فرصة مناسبة للزواج.

وأضافت خلال مداخلة مع الإعلامى عمرو خليل، ببرنامج "من مصر" الذى يذاع على قناة "cbc": "هى كانت بتحب خالد، والحب ده أثر فيها بشكل كبير، وهى حست إنها خسرت الحب ده، لأن في السن الصغير الشخص بياخدوا الحماس أوى، وبياخد قرارات غير صحيحة، لأنها كانت عنيدة وهو كان غيور، هى دى كانت الحكاية، ولما بتشتغل حاجة بحب، كل ده بيبان على الشاشة".

ومن جانبها قالت مخرجة العمل مها سليم: "ناقشت العديد من قضايا المرأة في العديد من الأعمال مثل امرأة في ورطة وغيره، ودائما بحس أن أقرب حاجة لقلبك المفروض تتكلم عنها، نجوم كبار شاركت في زي القمر، وحاسين أنهم هيضيفوا، وأنهم بيقدموا رسالة وبيطرحوا مشكلة موجودة في مجتمعنا".

وأضافت: "كان في تفصيلة كمان مهمة أوي، وهي كانت لقطة الجارة، هى كانت بتنصح البطلة، وبتكلمها بتدخل كبير، رغم إن بنت الجارة دي بتعاني من نفس المشكلة، فهى قالت لها خليكى فحالك وحال بنتك".

ومن جانبه قال المخرج محمد حماقى، خلال لقاءه بالبرنامج :"فكرة الخماسيات، بتكون مساحة ضيقة جدا، لأن عدد الحلقات اللي هما 5 حلقات بتوازي فيلم، أنت في الخمس حلقات بتحاول تضغط كل حاجة خلالهم، وأنا كحماقى شايف أن الأمر ألطف، وهى بالنسبة للمشاهد على ما يبدأ يحب ويتابع يلاقيها خلصت والإحساس ده بيتنقل للقائمين على العمل".

وأضاف: "كل خماسية أنت بتناقش قضية، بعكس لما تكون بتشتغل مسلسل، وأحداث وشخصيات وبتحكي حكاية واحدة أو بتناقش قضية واحدة، أنت طول الوقت بتفجر قضايا وتناقشها، وبتدي مساحة للناس انها تشتغل وتطلع إمكانياتها".