هيثم شاكر فى حواره مع تلفزيون اليوم السابع: الـtrend مفيش أسهل منه لكن النجاح الحقيقى صعب.. مش متخيل نفسى فى مجال غير المزيكا وألبومي القادم صيف 2022 .. أستخدم السوشيال ميديا فقط فى الدعاية لأعمالى الجديدة

يعتبر النجم هيثم شاكر واحد من أهم المطربين على الساحة الفنية في مصر والوطن العربي، وذلك لما له من ذوق خاص في اختيارالموسيقي والكلمات وهي عملية الاختيار التي يمنحها الوقت الكافي دون النظر لحجم الانتاج أو ضيق الوقت، يعمل بمبدأ الطبخ علي نار هادئة، إلى أن يصل للنتيجة التي يفكر فيها ويرتضيها قبل طرح أغانيه.

هيثم شاكر وعلي الكشوطي

هيثم شاكر

هيثم شاكر حل ضيفًا على تليفزيون اليوم السابع مع الزميل الكاتب الصحفي على الكشوطى، وتحدث شاكر عن أحدث أغنياته "صاحب الجمال" التى تم طرحها مؤخرًا، وعن ألبومه الجديد والذي يعمل عليه حاليا ومن المقرر طرحه صيف 2022، فضلا عن علاقته بالسوشيال ميديا وسبب كرهه "للترند".

ورحب هيثم شاكر في بداية اللقاء بمتابعين اليوم السابع مدليا بشهادته فى حق موقع اليوم السابع، حيث قال : "أرحب بمتابعي اليوم السابع اللى هو أكبر وأهم موقع مش فى مصر بس فى الوطن العربى كله ومش مجرد كلام ده من المواقع المهمة وله مصداقية".

الزميل علي الكشوطي يحاور هيثم شاكر

وعن استغراق أعماله الجديد وقتا طويلا لطرحها، قال هيثم: "أنا بحب المزيكا ومش بتخيل نفسى إن أعمل حاجة تانية غير مزيكا ولازم كل أغنية تمس المشاعر، وأنا مش ضد الأغانى الجديدة بس يظل الكلام من العوامل المهمة جدا فى صناعة الأغنية".

وعن أحدث أغانيه صاحب الجمال والتي حققت نجاحا كبيرا، والتحضير لها قال هيثم  "اهتم باختيار الكلام وزى ما اللحن مهم جدا والتوزيع صوت الفنان اللى بيغنى كمان مهم، فكل بطل منهم فى مكانه يمكن الموضوع بس أن المطرب هو اللى بيتصدر، هو المانيكان اللى بيلبس البدلة فى الآخر بس اللى بيعمل البدلة كلهم ناس مهمين جدا فى الصناعة".

وتابع "الشطارة إنك تختار وتاخد من التطور فى الكلام والمزيكا وتطلعه فيما يتناسب مع طبيعتك وشخصيتك الموسيقية وحاولت أحققه فى 3 الأغانى زى واقف على تكة وصاحب الجمال ومش عادية بعدت شوية عن شكل الناس بتحب تسمع هيثم فيه اللى هو طابع الشجن بس فى نفس الوقت أغانى لايقة عليا هى دى المعادلة".

وأضاف هيثم شاكر:" المعادلة أنك تبقى متصدق في الأغانى و متجريش وراء التريند و سهل جدا أنك تطلع تريند دلوقتى أقلع القميص وامشى في الشارع هتطلع تريند النجاح هو اللى صعب لكن التريند مفيش أسهل منه و هتعمل اى حاجة مثيرة للجدل هتطلع تريند".

وأردف في حديثه" والناس كتير بقيت واخدها شغلانه مش بيفكر يعمل حاجة ناجحة قد ما يفكر إزاى يعمل حاجة مثيرة للجدل عشان يطلع تريند الناس هتكلم عنك ساعتين وخلاص هتختفى في غيرك لكن الحاجة الفنية اللى بتنجح بتعيش هتعملها صح بكل أركانها هتعيش وده اللى بحاول اعمله وزمان كان بيقولوا على اللى صوته حلو حسه حلو".

وأوضح عن استخدامه لسوشيال ميديا، قائلا:"انا رافض انى اتحول لشخص تانى على السوشيال ميديا غيرى وغير طبيعية شخصيتى وطبعا كل الإحترام للناس اللى بتستخدم السوشيال ميديا وتنزل كل يوم صور، أنا بستخدم السوشيال بديل لطرق الدعاية اللى استخدمناها زمان كان بيبقى بوسترات في الشارع و التلفزيون لكن دلوقتى بعلن أن هنزل أغنية جديدة  على السوشيال ميديا بس".

وعن ألبومه الجديد رد، قائلا:" فكرة وجود ألبوم جديد له رونق وبيشكل حالة استمتاع مازالت مهمة ولازم أخد وقت في الأغانى ممكن سنتين أو أكتر وأحسن حل أكون موجود كل شهرين بأغنية و الألبوم إن شاء الله ينزل صيف 2022".