الفنانة شيرين: محدش يهرش لي ضهري غير إيدي.. والحب بهدلة

قالت الفنانة شيرين عبد الوهاب خلال لقاء مسجل مع الإعلامى عمرو أديب في برنامج الحكاية: أنا لا أحتاج مساعدة، إنما أحتاج احتواء الناس ليا، محتاجة الناس تقدر انى نازلة اشتغل رغم اللى انا فيه، وما يقولوش عنى كلمة تجرحنى مش عاوزة حاجة من حد.

وأضافت: أنا معايا أحسن دكتور نفسى في مصر، وأنا مش مريضة نفسيا لكن جالى وسواس قهرى لما خلفت بناتى، ويمكن أكون قولت ده قبل كده ومتخيلة انى ممكن عيالى يتأذوا من أقرب الناس ليا، والمشكلة الصغيرة ممكن يكبرها مخى ويخليها قد الهرم، والمشكلة اللى قد الهرم ممكن يخليها صغيرة، ولو مريضة نفسيا هقول بنفسى لكنى مش مريضة نفسيا بشهادة دكتورى، انا ست حرة ولو في حاجة انا اقولها قبل ما حد يقولها، علشان كده كنت بتريق على نفسى في الحفلة قبل ما حد يتريق عليا.

وتابعت: انا قبل ما ابتدى الموضوع ده قولت لأ هو يكبرنى بسنة واحدة، وعلى فكرة انا لسه بحبه، اللى حسيته ان جمهورى هو الحضن الأمان في الدنيا دى وبقول لأى إنسان في الدنيا ما يعتمدش على الآخر وكل واحد يعتمد على نفسه، ما حدش يهرشلى ضهرى غير ايدى، الحب بهدلة خلى قندلة.