نيرمين الفقى لـ شيرين: خليكى واثقة إننا كلنا بنحبك وانتى قمر فى كل أحوالك

وجهت النجمة نيرمين الفقى، رسالة تضامن ودعم للنجمة شيرين عبد الوهاب، بعد ظهورها خلال حفلها الغنائى فى أبو ظبى بدولة الإمارات، أمس الجمعة، وقد قصت شعرها بالكامل، مؤكدة أنها من أهم الأصوات المصرية والعربية، وأن الجمال الحقيقى للإنسان هو جمال الروح والإحساس والطيبة والتلقائية والتواضع.

وقالت نيرمين، عبر حسابها على إنستجرام: "أول مرة أكتبلك عشان أنا حاسه بيكى، حبيبتى انتى قمر فى كل أحوالك، عايزه أقولك إن الجمال الحقيقى للإنسان هو جمال الروح والإحساس والطيبة والأخلاق الطبيعية والتلقائية والتواضع، خليكى واثقة إننا كلنا بنحبك، أنتى من أهم الأصوات المصرية والعربية".

وأضافت نيرمين: "كلنا بنمر بصعاب وأوجاع مختلفة، بس بنكمل لأن الحياة جميلة بحلوها ومرها، انتى ربنا اداكى نعم كتيرة وجميلة، أهما أولادك وحب الناس، كملى ومستنين على أحر من الجمر أغانى تكسر الدنيا، بحبك جدا".

نيرمين الفقى

من ناحية أخرى، قالت الفنانة شيرين فى لقاء مسجل مع الإعلامى عمرو أديب لبرنامج الحكاية، الحمد لله أنا حلوة، أنا كويسة، بس كلام الدكتور اللى كان معاك أول امبارح كلام محترم، بس ما فيش مرض نفسى لكن فيه عدم اتزان، أنا نزلت شغلى علشان بناتى شافونى كده.

وأضافت شيرين: لم يكن أمامى غير كده، أنا حاسة أن دماغى بتفرز أفكار طول الوقت ولو سبت دماغى هتاكلنى، وأنا عملت كده لأنى ما كنتش حلوة فى عينيه، عملت كده علشان هو ما يشوفنيش حلوة، والفرق بين حلاقة الشعر والطلاق يوم واحد، حلقت شعرى قبل يوم واحد من الطلاق ودى مش أول مرة أقص شعرى، فاكر لما قلت إنى طالعة علشان أضحك الناس وقالوا عليا إنى كنت بتريق على البلد، كنت مدبوحة ودبحونى أكتر وقتها.