كريم قاسم: أول مرة شفت عمرو عابد كان لابس جزمة سندباد.. والأخير يرد: كنت شايفه فرفور

حل صناع وأبطال فيلم "الحفرة" ضيوفا فى برنامج "معكم" الذى تقدمه الإعلامية منى الشاذلي، والمذاع على قناة Cbc، وتحدث كريم قاسم وعمرو عابد عن علاقة الصداقة بينهما، حيث قال كريم قاسم: "اتعرفنا ببعض في ورشة تمثيل أخدناها عند أحمد كمال في 2004".

وأضاف كريم قاسم: "أول مرة شُفت فيها عمرو عابد كان لابس جزمة سندباد ولابس ملابس علاء الدين وفيه حتة تناكة كده، وقلت وقتها مين الواد ده اللى فاكر نفسه علاء الدين، بس يمكن قلت كده عشان وقتها كنا صغيرين عندنا 18 سنة وفى غيرة ممثلين بقى وكده".

واستكمل عمرو عابد: "أنا بالنسبة ليا قلت في أول مرة على كريم قاسم إيه الواد ده شكله فرفور، ومتخيل إن هو بتاع جامعة أمريكية وأنا من جامعة القاهرة، ولكن الصحوبية بدأت من خلال تدريبات الورشة وبقينا نطلع مشاهد مع بعض ونرتجل مع بعض، واكتشفنا إن فيه كيميا ما، وبعد الورشة بسنة عملنا الاوديشن لفيلم أوقات فراغ واتاخدنا إحنا الاتنين".

وأضاف عمرو عابد: "قررنا في لحظة اننا نكتب فيلم وقلنا هناخد شقة ونعيش فيها ونكتب الفيلم وعملنا كده وبقينا مستقلين عن أهلنا، وعيشنا وكتبنا الفيلم ولقيناه وحش، وكنا بنقسم ايجار الشقة كل شهر بينا ومستزلمات المنزل أيضا".

وعن فيلم الحفرة قال كريم قاسم: "عمرو عابد مخرج شاطر، وبعيدا عن انه من أعز اصدقائى وبحبه وبحترمه، هو عمل مسرحية لكلية حقوق مختلفة جدا، وكان دايما بيساعدنى في كل أوديشن أنا رايح أعمله، ولما ورانى الفيلم القصير اللى هو الحفرة ومطلبش منى أنتجه فقلتله يلا أنا هانتج الفيلم ده وقولى محتاج ايه ونعمله وكانت بالنسبة ليا فرصة إنى أخوض تجربة الإنتاج".