لقاء الخميسي تكشف لتليفزيون اليوم السابع كواليس حياتها الشخصية وأعمالها

استضاف تليفزيون اليوم السابع النجمة لقاء الخميسي في حوار خاص، تحدثت فيه عن حياتها وأعمالها.

وقالت الفنانة لقاء الخميسى، إن أكثر موقف تعرضت فيه للتنمر في حياتها، وقالت لقاء:"بصراحة التنمر الأكبر في حياتى هو الكورة، انا اتهريت بصراحة، انا واحدة حبيت راجل وما اعرفش هو بيلعب ايه ولا بيعمل ايه، فجأة دخلونى في الليلة وأنا أصلا لا ليا في الموضوع، وقعدت سنين يتنمروا عليا ويقولولى 6 – 1"

وأوضحت لقاء: "أنا أصلا مكنتش أعرف يعنى إيه 6 – 1 لأنى مبتفرجش على كورة، وكان في أول ما اتخطبنا الناس كانوا بيشوفونا مع بعض، ألاقى اللى يقولى يا بتاعة الـ 6، فسألت محمد عبد المنصف، أنا عاوزة أفهم يا عم إيه حكاية الـ 6 – 1 دى، ورحت عندهم البيت وقلت اقفل عليا الباب وافتحلى ماتش الـ 6 – 1 وأنا أصلا بكره الكورة أو مبحبهاش، وقعدت اتفرجت من وجهة نظر متفرج".

وتابعت لقاء:"أول ما اتفرجت قلت له يا عينى يا ابنى 6 – 1 ايه بس، ولقيت الراجل كان بيعلب لوحده في الملعب ضد فرقتين، دا رأيى، وأنا اكتشفت ان الناس متنمرة، وأنا بتكلم ان الناس ممكن تكون كانت مضايقة من مدرب، ودا بيحصل كتير لما يكون اللاعيبة مش عاوزة المدرب بتاعهم، وعاوزينه يمشى.

وتطرقت لقاء للحديث في جانب آخر عن عملها مع نجمى الكوميديا محمد هنيدى ومحمد سعد مشيدة بالثنائى، إلا أنها أكدت على أمر يخض محمد سعد وقالت:"محمد سعد، حقيقى مش بس كوميديان، وانما هو رائع في المشاعر والأحاسيس وعنده أعين مليئة بالأحاسيس ويعرف يعمل أدوار كتير مختلفة، واحنا محتاجين نشوفه كدا.

واحتفلت لقاء الخميسى بنجاح حدوتة "حتة من القمر" من مسلسل "زى القمر" فى ندوة اليوم السابع بحضور مؤلفة الحدوتة ميرنا الفقى ومنتجة العمل مها سليم، وشارك فى بطولتها محمد العمروسى، جيلان علاء، عايدة رياض، لمياء كرم، أمجد عابد، محمود الشرقاوى، أحمد خيرى، شادى سرور، مريم صالح  وإخراج محمد عبد الرحمن حماقى.