بسمة وهبة: بكلم ربنا وأعيط.. والصحة الحاجة الوحيدة اللى مقدرتش اشتريها بـ"فلوسى"

علقت الإعلامية بسمة وهبة، على ما كتبته على السوشيال ميديا بـ"أنها جسد بلا روح"، وقالت:"حسيت كدا وخاصة بعد سفر أولادي.. لما بشوفهم ترجعلي روحي.. ولكن لازم أعيش واتعايش.. وأحيانا بتصاحب على ألمي وابتلائي عشان أعرف أعيش.. أحيانا بهرب لحياتي بالشغل.. لكن في الإجمالي أنا سعيدة أو عندي حالة رضا".

وواصلت خلال حوارها على تلفزيون اليوم السابع: "ممكن أقعد لوحدى في غرفتي ليومين أو ثلاثة أيام.. وأكون في حالة تامل شديد مع الله.. وبقعد مع ربنا وأتكلم معاه.. وبكون في حالة سكون من الدنيا لبضعه أيام وبسمع وأقرأ قرآن  وأختلى بنفسى، وممكن أعيط.. وأنزل أسجد لأني بحس في السجود إن ربنا بيحضني.. وبعد الـ 3 أيام دول بطلع مجبورة الخاطر.. وآخر مرة عملت كدا قبل سفرى الأخير إلى لندن".

وردت على سؤال "إيه اللى بسمة وهبة مقدرتش تشتريه بفلوسها؟، وقالت : "الصحة.. كورونا أثبتت للعالم إننا ولا حاجة، وإن الدنيا على جناح باعوضة".