"أخدنا عين".. رامى صبرى يعتذر لـ عزيز الشافعى وتامر حسين.. فيديو

بعد أكثر من شهر على الخلاف بسبب أغنية "شكرا" التى غناها الهضبة عمرو دياب، وجه رامى صبرى رسالة اعتذار للشاعر الغنائى تامر حسين، والملحن عزيز الشافعى، على خلفية خلافهم الأخير، واعترف بأن الاتهامات التى سبق وأن وجهها إلى عزيز الشافعى غير صحيحة، وقال: "إحقاقا للحق وكل واحد ياخد حقه أغنية شكرا للفنان الكبير عمرو دياب، أنا فعلا كنت شغال فيها لكن الأغنية مش ملكى قانونا يعنى مثلا محدش خد منى حقوق أو مقابل مالى أو أخدت تنازل رسمي علشان بس أبرئ تامر حسين وعزيز الشافعى من الحتة دى".

وتابع: "وعزيز الشافعى أنت ملحن كبير ونجحنا سوا ماتزعلش من كلمة اتقالت في زعل واحنا داخلين على أيام مفترجة وشكلنا خدنا عين، ومن ساعت ما لحنت وكتبت حياتى مش تمام واحنا مش تمام، حبيبى يا عزوز، وحبيبى يا تامر يا مدعى يلا حصل خير".

فى المقابل، رد كل من الملحن والشاعر عزيز الشافعى والشاعر تامر حسين على اعتذار المطرب رامى صبرى له ومبادرته بالصلح معهما، حيث كتب عزيز عبر صفحته على موقع التواصل الاجتماعى فيس بوك قائلا: "حصل خير والحق أحق أن يتبع، بشكر الفنان والزميل رامي صبري على مبادرته الجميلة، وتوضيح الحقيقة للجمهور الكريم، وبفخر بنجاحاتنا سوا وبالعلامات اللى عملناها، والاعتذار من شيم الكبار، ورامي صبري فنان كبير وبتمنى له استمرارالنجاح والتوفيق وبشكره".

وكتب الشاعر تامر حسين عبر صفحته الخاصة على فيس بوك قائلا: "هو ده رامى صبرى اللى أنا أعرفه، كان يهمنى توضيح الحقيقة للجمهور المحترم اللى تخيل إننا ممكن نعمل تنازل لأى فنان أو ناخد مُقابل، وندى الأغنية لمطرب آخر، وكنت حزين ومأذى نفسياً من الموضوع ده وحقك عليا لو اتكلمت فى البرامج بحدة شوية فى الكلام أو اتكلمت بلهجة مش لهجتى معاك ولا مع أى زميل بس ده من زعلى إنك ماوضحتش كل ده".